सोनई | प्रतिनिधी
शनिशिंगणापूर देवस्थान परिसरात शनीभक्तांची बळजबरीने लूट करणाऱ्या तथाकथित ‘लटकू’ गँगवर अखेर पोलिसांनी पहिलीच ठोस आणि धडाकेबाज कारवाई केली आहे. पूजा साहित्य विक्रीच्या नावाखाली शनीभक्तांना अडवून, वाहनांचा पाठलाग करून विशिष्ट दुकानांकडे नेणाऱ्या लटकूंना रंगेहाथ पकडत पोलिसांनी गुन्हा दाखल केला आहे.
या कारवाईत विलास चव्हाण, ऋषिकेश संपत पवार आणि उद्देश दिलीप गव्हाणे या आरोपींचा समावेश असून, यामुळे शनिशिंगणापूरच्या इतिहासात प्रथमच लटकूंवर थेट गुन्हा दाखल झाल्याची नोंद झाली आहे.
🔴 वरिष्ठ अधिकाऱ्यांच्या आदेशानंतर अंमलबजावणी
दोन दिवसांपूर्वी विभागीय आयुक्त तथा देवस्थान प्रशासक डॉ. प्रवीण गेडाम आणि जिल्हा पोलिस अधीक्षक सोमनाथ घार्गे यांच्या आढावा बैठकीत लटकूंचा गंभीर मुद्दा ऐरणीवर आला होता. शनीभक्तांची होणारी अरेरावी, मानसिक त्रास आणि आर्थिक लूट लक्षात घेऊन डॉ. गेडाम यांनी लटकूंवर तात्काळ कारवाईचे स्पष्ट आदेश दिले होते. त्यानुसार पोलिसांनी थेट कृती करत विक्रेते व लटकूंवर गुन्हा दाखल केला.
🛑 राहुरी–शिंगणापूर रस्त्यावर पोलिसांचा कडेकोट बंदोबस्त
शिंगणापूर–राहुरी मार्गावर ठिकठिकाणी लटकू शनीभक्तांच्या वाहनांचा पाठलाग करत जबरदस्ती करत असल्याच्या तक्रारी वाढल्यानंतर प्रशासनाने बॅरिकेट्स लावून पोलिस यंत्रणा सक्रिय केली आहे. यामुळे लटकूंच्या मुसक्या आवळल्या असून परिसरात खळबळ उडाली आहे.
⚠️ पुन्हा प्रकार आढळल्यास कठोर कारवाईचा इशारा
मंदिर परिसरात किंवा रस्त्यावर अशा प्रकारचे गैरकृत्य आढळल्यास केवळ लटकूच नव्हे तर पूजा साहित्य विक्रेते, दुकान मालक आणि वाहनतळ मालकांवरही थेट कारवाई केली जाईल, असा कडक इशारा सपोनि आशीष शेळके यांनी दिला आहे.
🙏 शनीभक्तांत समाधान, प्रशासनावर कौतुकाचा वर्षाव
या निर्णायक कारवाईमुळे शनीभक्तांमध्ये समाधानाचे वातावरण असून, सर्व प्रशासकीय अधिकाऱ्यांचे जोरदार कौतुक केले जात आहे. “ही मोहीम कायमस्वरूपी सुरू ठेवावी,” अशी मागणी जोर धरू लागली आहे.
📢 राज्यभरात संदेश, देवस्थानाची प्रतिमा उजळली
शनिशिंगणापूरमधील या कारवाईचा संदेश राज्यभर पोहोचत असून, देवस्थानाची सकारात्मक प्रतिमा अधिक बळकट होत आहे. दिवसेंदिवस शनीभक्तांची संख्या वाढत असताना, मनमोकळेपणाने आणि भयमुक्त शनी दर्शन हीच प्रशासनाची ठाम भूमिका स्पष्ट झाली आहे.
