प्रधानमंत्री आवास योजनेअंतर्गत मंजूर झालेल्या घरकुलाच्या अनुदानाचे हप्ते मंजूर करून देण्यासाठी २० हजार रुपयांची लाच मागितल्याप्रकरणी लाचलुचपत प्रतिबंधक विभागाने (एसीबी) मोठी कारवाई केली आहे. या प्रकरणात ग्रामविकास अधिकारी, ग्रामपंचायत लिपिक (कंत्राटी) आणि गृहनिर्माण अभियंता (कंत्राटी) अशा तिघांविरुद्ध भ्रष्टाचार प्रतिबंध अधिनियम, १९८८ मधील कलम ७ व १२ अन्वये गुन्हा दाखल करण्याची प्रक्रिया राहुरी पोलीस ठाण्यात सुरू आहे.
या प्रकरणातील आरोपींमध्ये हैदर याकुब पटेल (वय ५६), ग्रामविकास अधिकारी, ग्रामपंचायत सात्रळ, ज्ञानदेव मोहन डुकरे (वय ४३), कंत्राटी लिपिक, ग्रामपंचायत सात्रळ आणि सचिन हौशीराम ब्राम्हणे, कंत्राटी गृहनिर्माण अभियंता, पंचायत समिती राहुरी यांचा समावेश आहे.
तक्रारदार यांना सन २०२३ मध्ये प्रधानमंत्री आवास योजनेअंतर्गत घरकुल मंजूर झाले होते. त्यांना पहिला १५ हजार रुपयांचा व दुसरा ७० हजार रुपयांचा हप्ता प्राप्त झाला होता. पुढील हप्ते मंजूर करून देण्यासाठी तसेच यापूर्वीच्या हप्त्यांच्या प्रक्रियेत मदत केल्याच्या मोबदल्यात आरोपींनी २० हजार रुपयांची लाच मागितल्याची तक्रार २९ जून २०२६ रोजी एसीबीकडे करण्यात आली होती.
तक्रारीची पडताळणी ३० जून रोजी करण्यात आली. पडताळणीत ग्रामविकास अधिकारी हैदर पटेल आणि लिपिक ज्ञानदेव डुकरे यांनी २० हजार रुपयांच्या लाचेची मागणी केल्याचे निष्पन्न झाले. त्यानंतर एसीबीने सापळा रचला.
सापळा कारवाईदरम्यान आरोपी ज्ञानदेव डुकरे यांनी तक्रारदाराकडून २० हजार रुपयांची लाच स्वीकारल्याचे निष्पन्न झाले. तसेच गृहनिर्माण अभियंता सचिन ब्राम्हणे यांनी ही लाच स्वीकारण्यासाठी डुकरे यांना प्रोत्साहन दिल्याचेही तपासात समोर आले आहे.
या प्रकरणी राहुरी पोलीस ठाण्यात भ्रष्टाचार प्रतिबंध अधिनियम, १९८८ मधील कलम ७ व १२ अन्वये गुन्हा दाखल करण्याची प्रक्रिया सुरू असून पुढील तपास सुरू आहे.
ही कारवाई पोलीस निरीक्षक सविता तांबे यांच्या नेतृत्वाखाली करण्यात आली. पोलीस उपअधीक्षक अजित त्रिपुटे यांनी कारवाईचे पर्यवेक्षण केले. पोलीस निरीक्षक राजू आल्हाट यांच्यासह एसीबीच्या पथकाने सापळा यशस्वी केला. या प्रकरणाचा पुढील तपास पोलीस निरीक्षक छाया देवरे करीत आहेत.
दरम्यान, लाचलुचपत प्रतिबंधक विभागाने नागरिकांना आवाहन केले आहे की, कोणताही लोकसेवक लाचेची मागणी करत असल्यास किंवा भ्रष्टाचाराबाबत माहिती असल्यास तात्काळ एसीबीकडे तक्रार नोंदवावी.
