शिर्डी परिसरात हरवलेले मंगळसूत्र स्वतःजवळ ठेवून आर्थिक फायदा मिळवण्याच्या उद्देशाने ते परत न केल्याप्रकरणी एका व्यक्तीविरुद्ध शिर्डी पोलीस ठाण्यात चोरीचा गुन्हा दाखल करण्यात आला आहे.
पोलीसांनी दिलेल्या माहितीनुसार, फिर्यादी सौ. सुमा शिवाजी वाणी (वय ४५, रा. गोवर्धन नगर, राहाता, जि. अहिल्यानगर) यांचे सुमारे ३ लाख १५ हजार रुपये किमतीचे मणीमंगळसूत्र दि. ३ जून २०२६ रोजी सावळी विहीर फाटा परिसरात खाली पडले होते. त्याचवेळी खरेदीसाठी आलेल्या विष्णु रा. रामचंद्रपुरम, जि. संगारेड्डी (तेलंगणा) या व्यक्तीने ते मंगळसूत्र जमिनीवरून उचलून स्वतःच्या खिशात टाकल्याचा आरोप आहे.
फिर्यादीनुसार, संबंधित व्यक्तीने मंगळसूत्र सापडूनही त्याबाबत कोणतीही माहिती न देता स्वतःच्या आर्थिक फायद्यासाठी ते बेकायदेशीररित्या जवळ ठेवले. याबाबतची तक्रार शिर्डी पोलीस ठाण्यात दाखल करण्यात आली असून भारतीय न्याय संहितेअंतर्गत चोरीचा गुन्हा नोंदविण्यात आला आहे.
या प्रकरणाचा पुढील तपास पोलीस निरीक्षक रणजित गलांडे यांच्या मार्गदर्शनाखाली शिर्डी पोलीस करीत आहेत.
