शिर्डी | प्रतिनिधी :
श्री साईबाबा संस्थान विश्वस्तव्यवस्था, शिर्डीच्या वतीने ८० व्या स्वातंत्र्य दिनानिमित्त शैक्षणिक संकुलाच्या क्रीडांगणावर राष्ट्रध्वजाचे ध्वजारोहण उत्साहात करण्यात आले. संस्थानचे मुख्य कार्यकारी अधिकारी तथा भा.प्र.से. अधिकारी गोरक्ष गाडीलकर यांच्या हस्ते सकाळी ८.१५ वाजता राष्ट्रध्वज फडकविण्यात आला.
यावेळी उपमुख्य कार्यकारी अधिकारी भिमराज दराडे, प्रशासकीय अधिकारी प्रज्ञा महांडुळे-सिनारे, संदीपकुमार भोसले, कार्यकारी अधिकारी अभियंता भिकन दाभाडे, मुख्य लेखाधिकारी मंगला वऱ्हाडे, संरक्षण अधिकारी रोहिदास माळी, वैद्यकीय संचालक डॉ. प्रितम वडगावे यांच्यासह संस्थानचे सर्व विभागप्रमुख, अधिकारी-कर्मचारी, शैक्षणिक संकुलातील शिक्षकवृंद व विद्यार्थी मोठ्या संख्येने उपस्थित होते.
ध्वजारोहणानंतर गोरक्ष गाडीलकर यांनी उपस्थितांना स्वातंत्र्य दिनाच्या शुभेच्छा देत देशाच्या स्वातंत्र्यासाठी बलिदान देणाऱ्या स्वातंत्र्यसैनिकांच्या त्यागाचे स्मरण केले.
यावेळी त्यांनी श्री साईबाबा संस्थानच्या शैक्षणिक व सामाजिक योगदानाचा आढावा घेत विद्यार्थ्यांना गुणवत्तापूर्ण शिक्षण, क्रीडा प्रशिक्षण तसेच आवश्यक सुविधा उपलब्ध करून देण्यासाठी विविध नवे उपक्रम राबविण्याची घोषणा केली.
दिशाभूल करणाऱ्या मजकुराविरोधातील कायदेशीर लढ्याला यश
यावेळी गाडीलकर यांनी श्री साईबाबांविषयी दिशाभूल करणाऱ्या मजकुराविरोधात संस्थानने सुरू केलेल्या कायदेशीर लढ्याबाबतही माहिती दिली. दिल्ली उच्च न्यायालयाच्या निर्देशांनंतर GAC कडून संबंधित व्हिडीओ व लेख २४ तासांत हटविण्याचे आदेश जारी झाल्याचे त्यांनी सांगितले.
या कायदेशीर लढ्याला मिळालेल्या यशाबद्दल त्यांनी दिल्ली उच्च न्यायालयाचे आभार मानले. तसेच संस्थानची बाजू न्यायालयात प्रभावीपणे मांडणारे ज्येष्ठ वकील प्रमोद कुमार दुबे व त्यांच्या सहकाऱ्यांचेही त्यांनी आभार व्यक्त केले.
कार्यक्रमाच्या शेवटी शैक्षणिक संकुलाचे संगीत शिक्षक सुधांशु लोकेगांवकर यांच्या मार्गदर्शनाखाली विद्यार्थ्यांनी देशभक्तीपर गीतांचे सादरीकरण केले. कार्यक्रमाचे सूत्रसंचालन कन्या विद्या मंदिरचे उपाध्यापक वसंत वाणी व क्रीडा शिक्षक राजेंद्र कोहकडे यांनी केले.
