सर्वपक्षीय ग्रामस्थांनी स्व. अजितदादा पवार यांना अश्रुपूरित श्रद्धांजली
महाराष्ट्राच्या राजकारणातील बुलंद नेतृत्व, सर्वसामान्यांचा आधार आणि जनतेच्या मनात घर केलेले व्यक्तिमत्त्व स्व. अजितदादा पवार यांच्या अकाली निधनाने संपूर्ण राज्य हादरून गेले आहे. त्यांच्या जाण्याने केवळ एक नेता नव्हे, तर जनतेचा खरा हितचिंतक हरपल्याची भावना प्रत्येकाच्या मनात आहे.
या दु:खद पार्श्वभूमीवर शिर्डी नगर परिषद कार्यालयात आज (दि. 30 जानेवारी 2026) सकाळी ठीक 11 वाजता सर्वपक्षीय ग्रामस्थांच्या वतीने शोकसभेचे आयोजन करण्यात आले होते. राजकीय मतभेद विसरून सर्व पक्षांचे पदाधिकारी, कार्यकर्ते, सामाजिक कार्यकर्ते व ग्रामस्थ मोठ्या संख्येने एकत्र आले होते.
शोकसभेदरम्यान स्व. अजितदादा पवार यांच्या प्रतिमेस पुष्पहार अर्पण करण्यात आले. काही क्षण संपूर्ण परिसर स्तब्ध झाला… मनात वेदना आणि ओठांवर मौन ठेवून उपस्थितांनी त्यांना भावपूर्ण श्रद्धांजली अर्पण केली.
जनतेसाठी अखेरपर्यंत झटणारा नेता आज काळाच्या पडद्याआड गेला असला, तरी त्यांचे कार्य, विचार आणि आठवणी जनतेच्या मनात सदैव जिवंत राहतील, अशी भावना यावेळी व्यक्त करण्यात आली.
शिर्डीतील सर्वपक्षीय ग्रामस्थांनी एकदिलाने एकत्र येत स्व. अजितदादांना श्रद्धांजली अर्पण केली.
ही शोकसभा केवळ कार्यक्रम न राहता, जनतेच्या अश्रूंनी वाहणारी भावनिक आदरांजली ठरली.
