शिर्डी (प्रतिनिधी) : शिर्डी परिसरातील एका वॉटर पार्कमध्ये छत्रपती संभाजीनगर येथील महिलेचे सुमारे १५ लाख रुपये किमतीचे सोन्याचे दागिने गायब झाल्याची घटना समोर आली आहे. ही घटना काल सायंकाळी घडल्याची माहिती मिळत असून, यामुळे वॉटर पार्क परिसरात एकच खळबळ उडाली आहे.
मिळालेल्या माहितीनुसार, संबंधित महिला आपल्या कुटुंबासह वॉटर पार्कमध्ये फिरण्यासाठी आली होती. यावेळी तिच्याकडे असलेले अंदाजे १५ लाख रुपये किमतीचे सोन्याचे दागिने हरवल्याचे तिच्या निदर्शनास आले. दागिने सापडावेत यासाठी महिलेने वॉटर पार्क प्रशासनाच्या मदतीने परिसरातील सीसीटीव्ही फुटेजची पाहणी केली. मात्र, फुटेज तपासूनही दागिन्यांचा कोणताही ठावठिकाणा लागलेला नाही.
घटनेनंतर महिलेने स्वतःच्या स्तरावर शोधाशोध सुरू ठेवली असून, अद्याप या प्रकरणी शिर्डी पोलीस ठाण्यात कोणतीही अधिकृत तक्रार दाखल झालेली नाही. त्यामुळे नेमके दागिने चोरीला गेले की कुठेतरी हरवले, याबाबत अद्याप स्पष्टता झालेली नाही.
दरम्यान, एवढ्या मोठ्या रकमेचे सोन्याचे दागिने गायब झाल्याची चर्चा परिसरात सुरू असून, संबंधित महिलेने पोलिसांकडे तक्रार दिल्यास पुढील तपासातून वस्तुस्थिती समोर येण्याची शक्यता आहे. पोलिसांत तक्रार दाखल झाल्यानंतरच या प्रकरणाचे नेमके स्वरूप स्पष्ट होणार आहे.
