शिर्डी : सोमवार दि. ०३ मार्च २०२६ रोजी होणाऱ्या खग्रास चंद्रग्रहणाच्या पार्श्वभूमीवर श्री साईबाबा संस्थान ट्रस्ट विश्वस्त व्यवस्थेमार्फत दर्शन व्यवस्थेत तात्पुरता बदल जाहीर करण्यात आला आहे.
संस्थान प्रशासनाच्या माहितीनुसार, दुपारी ०३.२० वा. ते सायंकाळी ०६.४८ वा. या कालावधीत श्री साईबाबा समाधी मंदिर तसेच संस्थान अंतर्गत सर्व मंदिरांमध्ये दर्शन व्यवस्था बंद राहणार आहे. या वेळेत मंदिर परिसरात धार्मिक मंत्रोच्चार व विधी सुरू राहतील.
चंद्रग्रहण संपल्यानंतर सायंकाळी ०७.०० वा. मंगलस्नान, त्यानंतर “शिर्डी माझे पंढरपूर” आरती व धुपारती संपन्न होईल. आरतीनंतर दर्शन व्यवस्था पूर्ववत सुरू करण्यात येईल. रात्री १०.०० वा. नियमित शेजारती होणार असल्याचे संस्थानकडून स्पष्ट करण्यात आले आहे.
गोरक्ष गाडीलकर, मुख्य कार्यकारी अधिकारी (भा.प्र.से.), यांनी भाविकांनी वरील बदलांची नोंद घ्यावी व संस्थान प्रशासनास सहकार्य करावे, असे आवाहन केले आहे.
खग्रास चंद्रग्रहणाच्या दिवशी मोठ्या संख्येने भाविक शिर्डीत दाखल होत असल्याने प्रशासनाने आवश्यक ती खबरदारी घेतली असून दर्शन वेळांमध्ये झालेल्या या तात्पुरत्या बदलाबाबत भाविकांनी नियोजनपूर्वक दर्शनासाठी येण्याचे आवाहन करण्यात आले आहे.
॥ साई राम ॥
