राहता (प्रतिनिधी) : राहता शहरात १४ वर्षीय अल्पवयीन मुलीचा विनयभंग करून तिला धमकी दिल्याच्या गंभीर घटनेमुळे शहरात तीव्र संतापाचे वातावरण निर्माण झाले आहे. या प्रकरणी राहता पोलीस ठाण्यात गुन्हा दाखल करण्यात आला असून पोलिसांनी मुख्य आरोपी हरिदास गायकवाड याला अटक केली आहे.
मिळालेल्या माहितीनुसार, ६ जून २०२६ रोजी दुपारी घडलेल्या या घटनेनंतर पीडित कुटुंबीयांनी पोलिसांकडे धाव घेत तक्रार दाखल केली. त्यानंतर पोलिसांनी तातडीने कारवाई करत आरोपीला ताब्यात घेतले. मात्र या घटनेमुळे नागरिकांमध्ये तीव्र नाराजी आणि अस्वस्थता निर्माण झाली आहे.
या पार्श्वभूमीवर नगराध्यक्ष, स्थानिक लोकप्रतिनिधी, पीडितेचे नातेवाईक आणि नागरिकांनी राहता पोलीस ठाण्यावर जाऊन पोलीस निरीक्षकांना निवेदन सादर केले. या प्रकरणाचा सखोल, निष्पक्ष आणि वेगवान तपास करून दोषी आढळणाऱ्या प्रत्येक व्यक्तीवर कठोर कायदेशीर कारवाई करण्यात यावी, अशी मागणी करण्यात आली.
नागरिकांनी या प्रकरणातील सर्व पैलूंची बारकाईने चौकशी करण्याची आवश्यकता व्यक्त केली असून पीडित कुटुंबाच्या सुरक्षिततेबाबतही चिंता व्यक्त केली आहे. तपासादरम्यान कोणत्याही प्रकारचा दबाव किंवा हस्तक्षेप होऊ नये, तसेच पीडितेला न्याय मिळावा, अशी भावना उपस्थितांनी व्यक्त केली.
अल्पवयीन मुलीशी संबंधित या गंभीर घटनेमुळे राहता शहरात खळबळ उडाली असून संपूर्ण परिसराचे लक्ष आता पोलीस तपास आणि पुढील कारवाईकडे लागले आहे.
