काम करण्यास गेल्यानंतर घराचे कुलूप तोडून चोरी!सोन्याची दागिने व रोख रक्कम असा एक लाख 26 हजारचा ऐवज लंपास!
शिर्डी (प्रतिनिधी) राहता तालुक्यातील कनकुरी येथे घराला कुलूप लावून शेतात काम करण्यासाठी गेल्यानंतर अज्ञात चोरट्याने घराचे कुलूप उघडून घरातील सुमारे एक लाख 26 हजार रुपये किंमतीचे सोन्याचे दागिने व रोख रक्कम चोरून नेल्याची फिर्याद शिर्डी पोलीस ठाण्यात दाखल करण्यात आली आहे.
यासंदर्भात पोलीस सूत्रांकडून मिळालेल्या अधिक माहिती अशी की, राहता तालुक्यातील कणकुरी येथील जालिंदर तुळशीराम शिंदे यांनी शिर्डी पोलीस ठाण्यात फिर्याद दिली आहे की, आपण कुटुंबासह कनकुरी येथे राहतो. एक डिसेंबर २०२३ रोजी सकाळी दहा वाजता आम्ही जेवण करून नेहमीप्रमाणे शेतात काम करण्यासाठी गेलो. मुलगा हर्षद हा कोपरगाव येथे कॉलेजला गेला. आम्ही जाताना घराचे हॉलचे रूमला मधून कडी लावली व किचनच्या रूमला कुलूप लावून शेतात कामाला गेलो होतो.
दुपारी दोन वाजता शेतातून घरी आल्यानंतर घराचे दार उघडे होते. व घरातील सामान अस्ताव्यस्त पडलेले होते. बेडरूम मधील कपाट सुद्धा उघडे दिसले. कपाटातील सामान इकडे तिकडे पडलेले होते. कपाटातील लाकर मध्ये ठेवलेले पैसे सोन्याचे दागिने दिसून आले नाही. कोणीतरी अज्ञात चोरट्याने माझ्या संमतीशिवाय , स्वतःच्या आर्थिक फायद्यासाठी घराचे कुलूप तोडून 25 हजार रुपये किंमतीचे सोन्याचे गळ्यातील झुबे ,70 हजार रुपये किंमतीचे सोन्याची गळ्यातील पोत व 31 हजार रुपये रोख असे एकूण एक लाख 26 हजार रुपयांचा ऐवज चोरून नेला आहे. अशा आशयाची फिर्याद त्यांनी शिर्डी पोलीस ठाण्यात दिली असून शिर्डी पोलीस ठाण्यात त्यानुसार गुन्हा रजिस्ट्रेशन नंबर 10 68 नुसार भादवि कलम 380/ 454 प्रमाणे गुन्हा दाखल करण्यात आला आहे .अधिक तपास शिर्डी पोलीस करत आहे.
