राहाता तालुक्यातील बारा ग्रामपंचायतच्या निवडणुकीसाठी आज मतदान होत आहे. शिर्डी जवळील निमगाव येथील ग्रामपंचायत निवडणुकीसाठीही आज रविवार 5 नोव्हेंबर रोजी मतदान होत असून येथे तीन पॅनल मध्ये लढत होत आहे. मतदानाला येथील शाळेत सकाळी मोठ्या उत्साहात सुरुवात झाली.
त्यानंतर गावातील व वाड्यावर त्यांवरील सर्वच प्रभागातील मतदार मतदान केंद्राकडे येऊ लागले व मतदान केंद्राबाहेर मतदारांची रांग लागल्याचे दिसून येत होते. वयोवृद्ध आजी-आजोबाही मतदानासाठी मोठ्या उत्साहाने मतदान केंद्रावर आल्याचे दिसून आले. तिन्ही पॅनलचे बुथवर मतदारांना मतदान यादीतील क्रमांक देण्याचे काम कार्यकर्त्यांकडून होत होते. सर्वच पॅनलच्या बुथवर कार्यकर्त्यांची, मतदारांची मोठी गर्दी दिसून येत होती. मतदारांमध्येही उत्साह दिसून येत होता.पोलीस बंदोबस्त ही तैनात करण्यात आला होता. कार्यकर्त्यांनी मतदान केंद्रा बाहेर गर्दी करू नये. यासाठी पोलीस वारंवार कार्यकर्त्यांना 100 मीटर दूर जाण्याचे सांगत होते.
शांततेत व उत्साहपूर्ण वातावरणात येथे मतदान सुरू होते. निमगाव येथे आज रविवारचा आठवडे बाजार या निवडणुकीमुळे बंद ठेवण्यात आला होता. आज रविवार असल्याने येथील प्रसिद्ध श्री खंडोबा मंदिरात सर्वच पॅनलच्या उमेदवारांनी दर्शन घेऊन विजयी होण्यासाठी श्री खंडेरायाला साकडे घातले. कार्यकर्तेही आपलाच पॅनल येथे विजयी होणार असा दावा करताना दिसून येत होते. अनेकांनी तर त्यासाठी नवस केले. पैजाही ही लावल्याचे समजते. येथील निवडणूक चुरशीची होत असून उद्या 6 नोव्हेंबर रोजी राहता येथे तहसील कार्यालयात मतमोजणी होणार असल्याने निमगाव ग्रामपंचायत निवडणुकीत कोण बाजी मारेल याकडे अवघ्या तालुक्याचे लक्ष लागून आहे
