शिर्डी | प्रतिनिधी
श्री साईबाबांच्या दरबारात भक्तीबरोबरच आरोग्यसेवेच्या माध्यमातून मानवसेवेचा वसा अधिक बळकट होत आहे. श्री साईबाबा संस्थान संचलित श्री साईबाबा हॉस्पिटलच्या न्यूरोसर्जरी विभागासाठी तब्बल ४९ लाख रुपये किमतीचे ‘हाय स्पीड ड्रिल सिस्टीम फॉर न्यूरोसर्जरी’ हे अत्याधुनिक वैद्यकीय उपकरण देणगीस्वरूपात प्राप्त झाले आहे.
प्रिझ्मा ग्लोबल लिमिटेड यांच्या वतीने कंपनीचे संस्थापक अध्यक्ष श्रीराम अय्यर यांनी ही महत्त्वपूर्ण देणगी संस्थानला प्रदान केली. त्यामुळे श्री साईबाबा हॉस्पिटलमधील न्यूरोसर्जरी विभागाच्या वैद्यकीय क्षमतेत आणखी भर पडली आहे.
या अत्याधुनिक उपकरणाचे श्री साईबाबा हॉस्पिटलमध्ये श्री साईबाबा संस्थानचे मुख्य कार्यकारी अधिकारी गोरक्ष गाडीलकर यांच्या हस्ते विधिवत पूजन करून लोकार्पण करण्यात आले.
यावेळी रुग्णालयाचे वैद्यकीय संचालक डॉ. प्रीतम वडगावे, न्यूरोसर्जन डॉ. संतोष उनवणे, डॉ. विश्वनाथ कामतगी, बायोमेडिकल इंजिनिअर श्रद्धा कोते, प्रणाली कांबळे, कार्तिक पांगरकर, सहाय्यक अधीसेविका मंदा थोरात यांच्यासह रुग्णालयातील डॉक्टर, अधिकारी व कर्मचारी उपस्थित होते.
गुंतागुंतीच्या न्यूरोसर्जरीला अत्याधुनिक तंत्रज्ञानाची साथ
मेंदू आणि मज्जासंस्थेशी संबंधित विविध गुंतागुंतीच्या शस्त्रक्रियांमध्ये हाय स्पीड ड्रिल सिस्टीम अत्यंत उपयुक्त ठरणार आहे. या उपकरणामुळे शस्त्रक्रियेदरम्यान आवश्यक असलेली अचूकता वाढण्यास तसेच उपचार अधिक प्रभावीपणे करण्यास वैद्यकीय पथकाला मदत होणार आहे.
श्री साईबाबा हॉस्पिटलमध्ये उपलब्ध होणाऱ्या या अत्याधुनिक उपकरणामुळे गरजू रुग्णांना आधुनिक न्यूरोसर्जरी उपचारांच्या सुविधेला अधिक बळ मिळणार असून, संस्थानच्या आरोग्यसेवेतील आधुनिकतेच्या दिशेने हे आणखी एक महत्त्वाचे पाऊल मानले जात आहे.
‘देणगी’तून आरोग्यसेवेला नवी ताकद!
श्री साईबाबांच्या चरणी अर्पण होणाऱ्या देणगीचा उपयोग समाजातील गरजू रुग्णांच्या सेवेसाठी होत आहे. ४९ लाखांचे अत्याधुनिक न्यूरोसर्जरी उपकरण ही केवळ वैद्यकीय साधनसामग्रीची देणगी नसून, गंभीर आजारांशी झुंज देणाऱ्या रुग्णांसाठी उपचाराच्या नव्या शक्यतांना बळ देणारे सेवाकार्य आहे. प्रिझ्मा ग्लोबल लिमिटेडच्या या योगदानातून ‘मानवसेवा हीच साईसेवा’ या भावनेचा प्रत्यय पुन्हा एकदा आला आहे.
