शिर्डी (प्रतिनिधी) : राहाता तालुक्यातील निमगाव येथे चोरट्यांनी पुन्हा एकदा धाडसी कृत्य करत दिवसाढवळ्या घरफोडी केली. घराचे मुख्य दरवाज्याचे कुलूप तोडून घरात प्रवेश करत कपाटातील लॉकर फोडून सोन्या-चांदीचे दागिने लंपास करण्यात आले. या घटनेमुळे निमगाव परिसरात भीतीचे वातावरण निर्माण झाले असून नागरिकांमध्ये संताप व्यक्त होत आहे.
पोलिसांनी दिलेल्या माहितीनुसार, गणेश भाऊसाहेब गाडेकर (रा. निमगाव, ता. राहाता) यांनी शिर्डी पोलीस ठाण्यात फिर्याद दिली आहे. फिर्यादी हे श्री साईबाबा संस्थानमध्ये नोकरीस असून, त्यांच्या अनुपस्थितीचा फायदा घेत अज्ञात चोरट्यांनी घरावर पाळत ठेवून ही चोरी केल्याचा प्राथमिक संशय व्यक्त केला जात आहे.
दि. ३ ऑगस्ट रोजी सकाळी सुमारे ११ वाजेच्या सुमारास अज्ञात चोरट्यांनी घराचे कुलूप तोडून आत प्रवेश केला. त्यानंतर घरातील कपाट उघडून लॉकरमध्ये ठेवलेले सोन्या-चांदीचे दागिने लबाडीच्या उद्देशाने चोरून नेले. चोरीस गेलेल्या मालाची किंमत सुमारे ₹४ हजार असल्याचे फिर्यादीत नमूद करण्यात आले आहे.
या प्रकरणी शिर्डी पोलीस ठाण्यात गुन्हा क्रमांक ६७८/२०२६ दाखल करण्यात आला असून भारतीय न्याय संहिता (BNS) कलम ३०५ अन्वये अज्ञात चोरट्यांविरोधात गुन्हा नोंदविण्यात आला आहे.
घटनेची माहिती मिळताच पोलीस उपविभागीय अधिकारी अमोल भारती, पोलीस निरीक्षक गलांडे यांनी घटनास्थळी भेट देऊन पाहणी केली. गुन्ह्याचा तपास पोलीस हेडकॉन्स्टेबल दातीर करीत असून, परिसरातील सीसीटीव्ही फुटेज, संशयितांची हालचाल तसेच तांत्रिक पुराव्यांच्या आधारे चोरट्यांचा माग काढण्याचे काम सुरू आहे.
गेल्या काही दिवसांपासून शिर्डी व राहाता तालुक्यात घरफोडीच्या घटनांमध्ये वाढ होत असल्याने नागरिकांनी घर बंद ठेवताना अधिक खबरदारी घ्यावी, तसेच संशयास्पद व्यक्ती दिसल्यास तातडीने पोलिसांना माहिती द्यावी, असे आवाहन पोलिसांकडून करण्यात आले आहे.
