शिर्डी | प्रतिनिधी
साईनगरी शिर्डीत दिवसाढवळ्या एका धर्मशाळेच्या मालकीच्या जागेत घुसून भिंत पाडल्याचा धक्कादायक प्रकार समोर आला आहे. काशी अन्नपूर्णा धर्मशाळेच्या आवारातील अंदाजे ७ ते ८ फूट भिंत टिकाव व लोखंडी गजाच्या सहाय्याने पाडून नुकसान केल्याप्रकरणी शिर्डी पोलिसांनी शिवसेना पदाधिकारी विजय सोपानराव जगताप यांच्यासह ४ ते ५ अनोळखी व्यक्तींविरुद्ध गुन्हा दाखल केला आहे.
धर्मशाळेचे व्यवस्थापक विश्वास वसंतराव पेकम यांनी दिलेल्या फिर्यादीनुसार, मंगळवारी (दि. २१ जुलै) सकाळी सुमारे ११ वाजता काही जण धर्मशाळेची भिंत पाडत असल्याची माहिती मिळाल्यानंतर ते घटनास्थळी पोहोचले. त्यावेळी संबंधित व्यक्ती मालकीच्या जागेत अनधिकृतपणे प्रवेश करून भिंत पाडत असल्याचे त्यांनी पाहिल्याचा दावा फिर्यादीत करण्यात आला आहे.
फिर्यादीने जाब विचारल्यानंतर “मीच भिंत पाडायला सांगितली आहे. तुम्ही यात पडू नका, येथून निघून जा,” असे विजय जगताप यांनी सांगितल्याचा गंभीर आरोप फिर्यादीत नमूद आहे. त्यानंतर पोलिसांना माहिती देण्यात आली. मात्र पोलिस घटनास्थळी पोहोचताच संबंधितांनी तेथून पलायन केल्याचेही फिर्यादीत म्हटले आहे.
या घटनेनंतर शिर्डी पोलीस ठाण्यात FIR क्रमांक ०६४४/२०२६ नुसार भारतीय न्याय संहिता (BNS) कलम ३२४ व ३३२(c) अंतर्गत गुन्हा दाखल करण्यात आला असून, पुढील तपास सुरू आहे.
