सावळीविहीर : घरातील कुटुंबीय झोपेत असतानाच पहाटेच्या अंधाराचा फायदा घेत १८ वर्षीय तरुणीला तिच्या परिचित तरुणाने मोटारसायकलवरून घेऊन गेल्याचा धक्कादायक प्रकार सावळीविहीर बु. येथे घडला. बहिणीला घेऊन जात असताना तिच्या भावाने विरोध करण्याचा प्रयत्न केला असता, दोन साथीदारांनी चाकूचा धाक दाखवत त्याला धमकावले आणि लाथाबुक्क्यांनी मारहाण केल्याचा गंभीर आरोप पोलिसांत दाखल तक्रारीत करण्यात आला आहे.
पोलिस तक्रारीनुसार, ५ सप्टेंबर रोजी पहाटे तीनच्या सुमारास घराचा दरवाजा वाजल्याने तरुणीचा अल्पवयीन भाऊ झोपेतून उठून बाहेर आला. त्यावेळी घराबाहेर त्याची १८ वर्षीय बहीण, रोशन घेगडमल (रा. निमगाव को-हाळे, ता. राहाता) आणि त्याचे दोन अनोळखी साथीदार उभे असल्याचे त्याला दिसले.
क्षणाचाही विलंब न करता रोशन घेगडमल याने तरुणीला मोटारसायकलवर बसवून तेथून निघून गेल्याचे तक्रारीत नमूद आहे. भावाने बहिणीला आवाज देत थांबविण्याचा प्रयत्न केला असता, त्याच्या दिशेने चाकू दाखवून धमकी देण्यात आली, तसेच त्याला लाथाबुक्क्यांनी मारहाण करण्यात आल्याचा आरोप आहे. आरडाओरड ऐकून आई-वडील बाहेर येताच संशयितांनी तेथून पलायन केले.
घटनेनंतर नातेवाईकांनी तातडीने डायल ११२ वर संपर्क साधला. पोलिसांनी घटनास्थळी धाव घेत तरुणीचा शोध घेण्याचा प्रयत्न केला; मात्र ती आढळून आली नाही.
या प्रकरणी रोशन घेगडमल आणि त्याच्या दोन अनोळखी साथीदारांविरुद्ध पोलिसांत तक्रार दाखल करण्यात आली आहे. तरुणीला नेमके कोणत्या कारणासाठी घेऊन जाण्यात आले, याबाबत तपास सुरू असून पोलिसांकडून तिचा शोध घेण्यात येत आहे.
पहाटेच्या सुमारास घराबाहेरून तरुणीला घेऊन जाणे आणि विरोध करणाऱ्या भावाला चाकूचा धाक दाखवून मारहाण केल्याच्या या प्रकारामुळे परिसरात खळबळ उडाली आहे.
