शिर्डी | प्रतिनिधी
साईनगरी शिर्डीत गुन्हेगारीचा कहर थांबण्याचे नाव घेत नसून सोंदडीबाबा मंदिर परिसरात सायंकाळच्या वेळी कोयता व चाकूसारख्या घातक हत्यारांसह तरुणांमध्ये रक्तरंजित हाणामारी झाल्याने शहर हादरले आहे. या घटनेत दोन्ही गटांतील तरुण गंभीर जखमी झाले असून एकमेकांविरोधात परस्पर (क्रॉस) गुन्हे दाखल करण्यात आले आहेत.
१७ जानेवारी रोजी सायंकाळी साडेपाचच्या सुमारास मंदिर परिसरात अचानक गोंधळ उडाला. जतिन घोगले याने दिलेल्या फिर्यादीनुसार, ओम सोनवणे, शुभम सोनवणे, साई सोनवणे व पप्पु ऊर्फ ज्ञानेश्वर सोनवणे यांनी शिवीगाळ करत कोयत्यासारख्या वस्तूने हल्ला केला. डोक्यावर व पायावर वार करण्यात आल्याने जतिन रक्तबंबाळ झाला, तर त्याचा मित्र आदित्य शेजवळ याच्या चेहऱ्यावर व डोळ्याजवळ गंभीर दुखापत झाली. हाणामारीदरम्यान जतिनचा मोबाईल फुटून गहाळ झाल्याचा आरोप आहे.
दरम्यान, ओम ज्ञानेश्वर सोनवणे यानेही पोलिसांत दिलेल्या फिर्यादीत धक्कादायक आरोप केले आहेत. त्यानुसार, आदित्य शेजवळ, महेश माने, जतिन घोगले व सुमित चेहरा यांनी त्याचा भाऊ शुभम याला मारहाण केली. तसेच आदी शेजवळ याने चाकूसारख्या हत्याराने ओम व त्याच्या भावावर वार करून दोघांनाही जखमी केले. हल्ल्यानंतर “पोलीस तक्रार केल्यास जिवंत सोडणार नाही” अशी जीवे मारण्याची धमकी दिल्याचाही आरोप आहे.
सार्वजनिक ठिकाणी, तेही मंदिर परिसरात, अशा पद्धतीने धारदार शस्त्रांचा वापर झाल्याने नागरिकांमध्ये प्रचंड दहशत पसरली आहे. साईनगरीत कायदा-सुव्यवस्थेचा प्रश्न पुन्हा ऐरणीवर आला असून, शिर्डी पोलीस ठाण्यात दोन्ही गटांविरोधात गंभीर कलमान्वये गुन्हे दाखल करून तपास सुरू करण्यात आला आहे.
शहरात वाढत्या टोळक्यांच्या दहशतीमुळे सामान्य नागरिक असुरक्षित होत असून “शिर्डीत कायद्याचा धाक उरलाय तरी किती?” असा संतप्त सवाल उपस्थित केला जात आहे.
