विदर्भातील ऐतिहासिक यशानंतर श्री साईबाबांच्या पादुका दर्शन सोहळ्याचा उत्तर भारतातील दौरा सध्या जोमात सुरू असून हजारो साईभक्तांच्या उत्साहपूर्ण उपस्थितीने प्रत्येक शहरात भक्तिभावाचे अनोखे वातावरण निर्माण झाले आहे.
दिनांक ०१ डिसेंबर ते १४ डिसेंबर २०२५ या कालावधीत दिल्ली, चंदीगड, जालंधर, लखनौ आदी प्रमुख शहरांत पादुका दर्शनाचे आयोजन करण्यात आले आहे.
🔹दिल्ली, नोएडा, रोहिणी येथे साईभक्तांचा मोठा सहभाग
दौऱ्याची सुरुवात ०१ डिसेंबर रोजी दिल्ली येथून झाली. त्यानंतर नोएडा आणि रोहिणी येथे झालेल्या पादुका दर्शन सोहळ्याला हजारो भाविक उपस्थित राहिले.
श्रींच्या पादुकांचे दर्शन घेण्यासाठी भाविकांच्या मोठ्या रांगा लागल्या होत्या. ‘ॐ साईराम’च्या घोषणांनी संपूर्ण परिसर भक्तीरसाने न्हाऊन निघाला होता.
वृद्ध, महिलांपासून ते युवकांपर्यंत सर्वांनी भक्तिभावाने पादुका दर्शनाचा लाभ घेतला.
🔹चंदीगडमध्ये भजन-कीर्तन, ढोल ताशे, पुष्पवृष्टीत पादुकांचे भव्य स्वागत
०५ डिसेंबर रोजी चंदीगडमध्ये पादुका पोहोचताच शहरात भव्य स्वागत मिरवणुकीचे आयोजन करण्यात आले.
भजनमंडळे, ढोल-ताशा पथके, टाळ-मृदुंग, फुलांची पुष्पवृष्टी, महिलांच्या आरत्या आणि सामाजिक संस्थांचे स्वागत उपक्रम यामुळे संपूर्ण परिसरात साईभक्तीची अभूतपूर्व ऊर्जा निर्माण झाली.
स्थानिक संस्था, महिला मंडळे, युवक-वृद्ध संघटना तसेच आदिवासी व दिव्यांग बांधवांनी आणि अनाथालयातील मुलांनीही पादुकांचे दर्शन घेऊन भावनिक क्षण अनुभवले.
🔹आगामी शहरांतही मोठा कार्यक्रम; संस्थानचे सीईओ गोरक्ष गाडिलकर यांचे आवाहन
दौऱ्याचा पुढील विस्तार खालील शहरांत होणार आहे:
जालंधर – ०७ डिसेंबर
कुरुक्षेत्र – ०८ डिसेंबर
आगरा – ०९ व १० डिसेंबर
लखनऊ – ११ व १२ डिसेंबर
बाराबंकी – १३ डिसेंबर
या प्रत्येक ठिकाणी स्थानिक पातळीवर भव्य धार्मिक मिरवणुका, सेवा उपक्रम, भजन-कीर्तन, आरत्या आणि सांस्कृतिक कार्यक्रमांचे आयोजन करण्यात आले आहे.
श्री साईबाबा संस्थानचे मुख्य कार्यकारी अधिकारी गोरक्ष गाडिलकर यांनी भाविकांना आवाहन करताना म्हटले की,
“पादुका दर्शन हा अत्यंत पवित्र आणि दुर्लभ अनुभव आहे. ज्या ठिकाणी दर्शन आयोजित करण्यात आले आहे, तेथे सर्व साईभक्तांनी मोठ्या श्रद्धेने उपस्थित राहून या सोहळ्याचा लाभ घ्यावा.”
