शिर्डी | प्रतिनिधी
आखातात निर्माण झालेल्या युद्धजन्य परिस्थितीमुळे देशात एलपीजी गॅस पुरवठ्यावर ताण निर्माण झाला असताना प्रशासनाला गॅस वितरणाची तारेवरची कसरत करावी लागत आहे. अशा परिस्थितीत गोरगरिबांच्या घरगुती गॅसवर डल्ला मारणाऱ्या शिर्डीतील काही हॉटेल व्यावसायिकांवर राहाता तहसील प्रशासनाने धडक कारवाई करत पाच ठिकाणांहून घरगुती गॅस सिलेंडर जप्त केले.
राज्यात सध्या गॅस टंचाईची परिस्थिती निर्माण होत असल्याने सर्वसामान्य नागरिकांची चूल पेटते की नाही, हा प्रश्न गंभीर बनला आहे. अशा वेळी काही व्यावसायिकांकडून घरगुती गॅस सिलेंडरचा वापर हॉटेल व्यवसायासाठी होत असल्याच्या तक्रारी प्रशासनाकडे प्राप्त झाल्या होत्या.
अहिल्यानगर जिल्ह्याचे जिल्हाधिकारी यांनी जिल्ह्यातील गॅस पुरवठा सुरळीत राहावा तसेच घरगुती गॅसचा गैरवापर रोखण्यासाठी कठोर कारवाई करण्याचे आदेश दिले होते. त्यानुसार राहाता तहसील कार्यालयाकडून पुरवठा निरीक्षक अधिकारी स्नेहल गायकवाड यांच्या नेतृत्वाखाली विशेष पथक तयार करण्यात आले.
या पथकाने शिर्डीतील नगर–मनमाड रोड तसेच कोते गल्ली परिसरात धडक मोहीम राबवली. तपासणीदरम्यान पाच ठिकाणी घरगुती गॅस सिलेंडरचा व्यावसायिक वापर होत असल्याचे आढळून आले. त्यामध्ये पुना टी हाऊस (कोते गल्ली), हॉटेल नंदादीप, पंजाबी ढाबा (नगर–मनमाड रोड), सदगुरु ढाबा (कोते गल्ली) आणि चंद्रकला कोते यांचे चहाचे दुकान या आस्थापनांचा समावेश आहे.
पथकाने तात्काळ कारवाई करत संबंधित ठिकाणांवरील घरगुती सिलेंडर जप्त केले. जप्त केलेले सिलेंडर साई गणेश गॅस एजन्सी येथे जमा करण्यात आले असून संपूर्ण अहवाल जिल्हाधिकाऱ्यांकडे पाठविण्यात आला आहे.
दरम्यान गॅस टंचाईच्या पार्श्वभूमीवर घरगुती गॅसची वाटमारी करणाऱ्यांविरोधात तहसील प्रशासन कोणती कठोर कारवाई करते, याकडे नागरिकांचे लक्ष लागले आहे.
इशारा : घरगुती गॅसचा गैरवापर महागात पडणार
घरगुती गॅस सिलेंडरचा हॉटेल, ढाबा किंवा व्यावसायिक कारणासाठी वापर करणाऱ्यांवर कठोर कारवाई केली जाईल, असा स्पष्ट इशारा तहसील प्रशासनाने दिला आहे. अशा प्रकारची माहिती नागरिकांनी प्रशासनाला दिल्यास तातडीने धडक कारवाई करण्यात येणार असल्याचेही सांगण्यात आले आहे.
