निमगाव (ता. राहाता) | प्रतिनिधी
निमगाव येथील दिवंगत स्व. हरिभाऊ तुळशीराम जगताप यांच्या द्वितीय स्मृतीदिनानिमित्त श्रद्धांजली कार्यक्रम उद्या शनिवार दि. १० जानेवारी २०२६ रोजी सकाळी १० वाजता डॉ. बाबासाहेब आंबेडकर स्मारक, निमगाव येथे आयोजित करण्यात आला आहे.
स्व. हरिभाऊ जगताप हे गोडबोले, मनमिळावू व प्रेमळ स्वभावाचे व्यक्तिमत्त्व म्हणून संपूर्ण परिसरात परिचित होते.
कोणताही भेदभाव न करता सर्व समाजाला एकत्र घेऊन चालणारे सामाजिक कार्यकर्ते अशी त्यांची ओळख होती. गावातील सामाजिक, सांस्कृतिक तसेच अडचणीच्या प्रसंगी ते नेहमी पुढे असायचे. त्यांच्या शब्दात मृदुता होती, पण विचारात ठामपणा होता.
समाजसेवेबरोबरच त्यांनी आपल्या कुटुंबालाही संस्कारांची शिदोरी दिली. आपल्या मुलांना प्रामाणिकपणा, कष्टाची जाणीव आणि समाजभानाचे संस्कार त्यांनी लहानपणापासून दिले. त्यामुळेच आज त्यांची मुले व कुटुंबीय समाजात सन्मानाने व जबाबदारीने वावरताना दिसतात, असे भावनिक उद्गार ग्रामस्थांकडून व्यक्त होत आहेत.
त्यांच्या पश्चात पत्नी, मुले, नातवंडे असा मोठा परिवार असून, त्यांच्या आठवणी आजही निमगावच्या प्रत्येक घरात जिवंत आहेत. त्यांच्या जाण्याने समाजात निर्माण झालेली पोकळी कधीही न भरून निघणारी असल्याची भावना नागरिक व्यक्त करत आहेत.
तरी या स्मृतीदिन कार्यक्रमास मोठ्या संख्येने उपस्थित राहून स्व. हरिभाऊ तुळशीराम जगताप यांना आदरांजली अर्पण करावी, असे आवाहन समस्त जगताप परिवार, निमगाव यांच्या वतीने करण्यात आले आहे.
या श्रद्धांजली कार्यक्रमास आयु. चंद्रभागा हरिभाऊ जगताप (पत्नी), आयु. विजय हरिभाऊ जगताप (मुलगा), आयु. ज्ञानदेव हरिभाऊ जगताप (मुलगा) यांच्यासह नातवंडे, नातसून, आप्तेष्ट, ग्रामस्थ, मित्रपरिवार व हितचिंतक मोठ्या संख्येने उपस्थित राहणार आहेत.पंचक्रोशीतील विविध क्षेत्रांतील मान्यवर, ग्रामस्थ, मित्रपरिवार, हितचिंतक व आप्तेष्ट मोठ्या संख्येने उपस्थित राहणार असून, स्व. हरिभाऊ जगताप यांच्या कार्याचा व व्यक्तिमत्त्वाचा गौरव करण्यात येणार आहे.
