शिर्डी : साईनगरीत मोटारसायकल चोरीच्या घटना थांबण्याचे नाव घेत नसून आता थेट आश्रम परिसरातूनच दुचाकी चोरीला जात असल्याने नागरिकांमध्ये चिंतेचे वातावरण निर्माण झाले आहे. श्री साईबाबा आश्रम संस्थानच्या पार्किंगमधून एक मोटारसायकल चोरीला गेल्याची घटना उघडकीस आली असून याप्रकरणी शिर्डी पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे.
याबाबत फिर्यादी Subhash Radhu Dhav (रा. जोगेश्वरी, ता. नेवासा, जि. अहिल्यानगर) यांनी शिर्डी पोलीस ठाण्यात तक्रार दिली आहे. फिर्यादी यांनी आपली हिरो स्प्लेंडर प्लस कंपनीची मोटारसायकल (क्रमांक MH-17-CU-4718) श्री साईबाबा आश्रम संस्थानच्या पार्किंगमध्ये सुरक्षिततेसाठी हँडल लॉक करून उभी केली होती. मात्र काही वेळाने ते परत आले असता पार्किंगमध्ये उभी केलेली मोटारसायकल अज्ञात चोरट्याने चोरून नेल्याचे लक्षात आले.
या घटनेमुळे आश्रम परिसरातील पार्किंग सुरक्षेवर प्रश्नचिन्ह उपस्थित होत असून चोरीस गेलेल्या मोटारसायकलची अंदाजे किंमत सुमारे २० हजार रुपये असल्याचे फिर्यादीने नमूद केले आहे. घटनेची माहिती मिळताच शिर्डी पोलिसांनी तात्काळ गुन्हा नोंदवून परिसरातील सीसीटीव्ही फुटेज तपासण्यास सुरुवात केली आहे.
सध्या शिर्डी शहरात मोटारसायकल चोरीच्या घटनांमध्ये वाढ होत असल्याने नागरिकांनी आपली वाहने अधिक सुरक्षित ठिकाणी उभी करावी, तसेच लॉक व इतर सुरक्षेची काळजी घ्यावी, असे आवाहन पोलिसांकडून करण्यात येत आहे.
या प्रकरणी शिर्डी पोलीस ठाण्यात चोरीचा गुन्हा दाखल करण्यात आला असून पुढील तपास पोलीस अंमलदार पोना गोसावी करीत आहेत. तपासावर प्रभारी पोलीस निरीक्षक गलांडे यांचे मार्गदर्शन आहे.
