शिर्डी (दि. २० ऑक्टोबर २०२५) —
श्री साईबाबा संस्थानच्या श्री साईबाबा सुपर स्पेशालिटी हॉस्पिटलमध्ये दि. १३ व १४ ऑक्टोबर रोजी मिट्रल व्हॉल्व रिपेअर सर्जरी शिबीर यशस्वीपणे पार पडले.
या शिबिरात ७ रुग्णांवर अत्यंत जटिल पण पूर्णपणे मोफत हृदय शस्त्रक्रिया करण्यात आल्या.
खाजगी रुग्णालयात लाखो रुपयांचा खर्च येणाऱ्या या शस्त्रक्रिया श्री साईबाबा हॉस्पिटलमध्ये शासनाच्या योजनेअंतर्गत विनामूल्य करण्यात आल्या.
🩺 सुप्रसिद्ध कार्डिएक सर्जन डॉ. प्रियंकर सिन्हा यांचे मार्गदर्शन
या शिबीरात अहमदाबादचे प्रसिद्ध कार्डिएक सर्जन डॉ. प्रियंकर सिन्हा यांनी प्रमुख शल्यचिकित्सक म्हणून कार्य केले.
त्यांना डॉ. महेश मिस्त्री व डॉ. श्रेयश पोतदार यांनी सहकार्य केले.
भुलतज्ञ म्हणून डॉ. संतोष मराठे आणि डॉ. विजय कर्डीले, तर परफ्युजनिस्ट नदीम अहमद व शुभम पाचपिंड यांनी महत्त्वाची भूमिका बजावली.
संपूर्ण कार्डिएक सर्जरी युनिटच्या समन्वित प्रयत्नांमुळे हे शिबीर अत्यंत यशस्वी ठरले.
❤️ “नैसर्गिक व्हॉल्व दुरुस्ती” — रुग्णांसाठी नवजीवन
डॉ. महेश मिस्त्री यांनी सांगितले की,
“मिट्रल व्हॉल्व पूर्णपणे बदलण्याऐवजी नैसर्गिक व्हॉल्व दुरुस्त करण्याचे अत्याधुनिक तंत्रज्ञान आम्ही वापरले.
रुग्णांना स्वतःचा व्हॉल्व टिकवून ठेवता आला असून, त्यांना आयुष्यभर औषधांवर अवलंबून राहावे लागणार नाही.”
रुग्णांचे नातेवाईक म्हणाले,
“शिर्डीच्या पवित्र भूमीत श्री साईबाबांच्या प्रेरणेने आमच्या रुग्णांना नवजीवन मिळाले — हीच खरी रुग्णसेवा म्हणजे ईश्वरसेवा.”
🌟 संस्थानकडून टीमचा गौरव व अभिनंदन
हे शिबीर मुख्य कार्यकारी अधिकारी श्री. गोरक्ष गाडीलकर (भा.प्र.से.) यांच्या मार्गदर्शनाखाली आयोजित करण्यात आले.
उपमुख्य कार्यकारी अधिकारी श्री. भिमराज दराडे,
आणि उपवैद्यकीय संचालक डॉ. प्रितम वडगावे यांनी
कार्डिएक विभाग व अहमदाबाद येथील डॉ. प्रियंकर सिन्हा यांच्या टीमचे अभिनंदन केले.
“रुग्णसेवा हीच ईश्वरसेवा” या श्री साईबाबांच्या शिकवणुकीप्रमाणेच,
या शिबीराने साईबाबा हॉस्पिटलच्या आरोग्य सेवेचा गौरव पुन्हा उजळविला आहे.
