शिर्डी (प्रतिनिधी) — शिर्डी येथील उद्योजक सुनिल सोनवणे यांची कन्या, शिर्डीची भूमिपुत्र डॉ. सृष्टी सोनवणे हिने एमबीबीएस परीक्षेत उच्च श्रेणीत यश संपादन करत शहराच्या शिरपेचात मानाचा तुरा रोवला आहे. तिच्या या उल्लेखनीय यशाबद्दल सर्व स्तरांतून तिचे कौतुक होत असून विविध ठिकाणी तिचा सत्कार करण्यात येत आहे.
डॉ. सृष्टी सोनवणे हिने आपल्या जिद्द, चिकाटी आणि सातत्यपूर्ण परिश्रमाच्या जोरावर हे यश मिळवले आहे. तिच्या या यशामुळे शिर्डी परिसरातील विद्यार्थ्यांसाठी ती प्रेरणास्थान ठरत आहे. वैद्यकीय क्षेत्रात आपले स्थान निर्माण करत समाजसेवेची भावना जपण्याचा तिचा संकल्पही कौतुकास्पद आहे.
या यशात तिच्या कुटुंबियांचे मोठे योगदान असून विशेषतः वडील सुनिल सोनवणे यांचे मार्गदर्शन व आईचे पाठबळ तिला लाभले. यावेळी तिच्यासमवेत सोनाली सोनवणे यांचीही उपस्थिती होती.
डॉ. सृष्टी सोनवणे हिच्या पुढील वाटचालीसाठी सर्व स्तरांतून शुभेच्छांचा वर्षाव होत आहे.
