साईनगरीचा प्रामाणिकपणाचा वारसा कायम!
श्री साईबाबा संस्थानच्या आरोग्य विभागातील कर्मचारी केवळ मंदिर परिसर स्वच्छ ठेवण्याचे काम करत नाहीत, तर साईभक्तांचा विश्वासही जपतात. साफसफाईदरम्यान सापडणारे पैसे, मोबाईल, दागिने, पासपोर्ट, व्हिसा अशा मौल्यवान वस्तू कोणताही मोह न बाळगता संबंधित मालकांना परत करण्याची परंपरा संस्थानच्या कर्मचाऱ्यांनी वर्षानुवर्षे जपली आहे. त्यामुळेच श्री साईबाबा मंदिर परिसर स्वच्छतेसोबतच प्रामाणिकपणासाठीही जगभरात ओळखला जातो.
ह
गुरुस्थान परिसरात विसरलेली दीड लाखांचे दागिने व व्हिसा असलेली पर्स; संस्थानच्या कर्मचाऱ्याने प्रामाणिकपणे केली परत
उपशीर्षक :
जर्मनीहून आलेल्या साईभक्ताला मोठा दिलासा; आरोग्य विभागाचे कर्मचारी उत्तम चाबुकस्वार यांच्या प्रामाणिकपणाचे सर्वत्र कौतुक
शिर्डी | प्रतिनिधी
श्री साईबाबा मंदिर परिसरातील प्रामाणिकपणाची आणखी एक प्रेरणादायी घटना बुधवारी घडली. जर्मनी येथून साईबाबांच्या दर्शनासाठी आलेले साईभक्त श्री. धनुष हे आपल्या कुटुंबासह दर्शनासाठी आले होते. त्यांच्यासोबत अवघ्या पाच महिन्यांचे बाळही होते. दर्शनानंतर गुरुस्थान परिसरात ते चुकून आपली पर्स विसरून निघून गेले.
या पर्समध्ये सुमारे १० ग्रॅम वजनाचे बाळाचे सोन्याचे दागिने, अंदाजे ₹१ लाख ५० हजारांची किंमत असलेले दागिने तसेच जर्मनीला परत जाण्यासाठी आवश्यक असलेला व्हिसा होता. अवघ्या तीन दिवसांनंतर त्यांचा परतीचा प्रवास असल्याने पर्स हरवल्याची जाणीव होताच त्यांच्या कुटुंबाची मोठी धावपळ उडाली.
दरम्यान, मंदिर परिसराची नियमित साफसफाई करत असताना श्री साईबाबा संस्थानच्या आरोग्य विभागातील कर्मचारी श्री. उत्तम चाबुकस्वार यांना ही पर्स आढळली. त्यांनी क्षणाचाही विलंब न लावता ती संस्थानच्या संरक्षण कार्यालयात जमा केली. त्यानंतर आवश्यक पडताळणी करून संबंधित साईभक्तांची ओळख निश्चित करण्यात आली आणि व्हिसासह सर्व सोन्याचे दागिने सुरक्षितपणे त्यांच्याकडे सुपूर्द करण्यात आले.
हरवलेली पर्स आणि मौल्यवान वस्तू सुखरूप परत मिळाल्यानंतर जर्मनीहून आलेल्या साईभक्तांनी संस्थानच्या कर्मचाऱ्यांच्या प्रामाणिकपणाबद्दल कृतज्ञता व्यक्त केली. “साईबाबांच्या नगरीत आमचा विश्वास अधिक दृढ झाला,” अशी भावना त्यांनी व्यक्त केली.
या उल्लेखनीय प्रामाणिकपणाबद्दल श्री साईबाबा संस्थानचे मुख्य कार्यकारी अधिकारी मा. श्री. गोरक्ष गाडीलकर तसेच उपमुख्य कार्यकारी अधिकारी श्री. भीमराज दराडे यांनी कर्मचारी श्री. उत्तम चाबुकस्वार यांचे अभिनंदन करून त्यांच्या कर्तव्यनिष्ठेचे कौतुक केले.
श्री साईबाबांच्या सेवेत कार्यरत असलेले कर्मचारी केवळ स्वच्छतेची जबाबदारी पार पाडत नाहीत, तर आपल्या प्रामाणिक व सेवाभावी वृत्तीमुळे साईभक्तांचा विश्वासही जपत आहेत. त्यामुळेच शिर्डीची ओळख केवळ श्रद्धेची नव्हे, तर प्रामाणिकपणा आणि सेवाभावाची नगरी म्हणूनही अधिक दृढ होत आहे
