शिर्डी : शहरात सार्वजनिक ठिकाणी मद्यपान करून गोंधळ घालणाऱ्यांविरोधात शिर्डी पोलिसांनी कडक भूमिका घेतली असून काल रात्री बिअर शॉपसमोर उभे राहून मद्यपान करणाऱ्या व्यक्तींवर धडक कारवाई करण्यात आली. पोलिसांच्या या कारवाईमुळे मद्यपींमध्ये एकच खळबळ उडाली.
मिळालेल्या माहितीनुसार, शहरातील काही बिअर शॉपसमोर मद्यपान केल्यानंतर अनेकदा वाद, शिवीगाळ आणि मारामारी होत असल्याच्या तक्रारी पोलिसांकडे प्राप्त झाल्या होत्या. या पार्श्वभूमीवर पोलीस निरीक्षक रणजित गलांडे यांच्या मार्गदर्शनाखाली विशेष मोहीम राबविण्यात आली.
कारवाईदरम्यान सार्वजनिक ठिकाणी मद्यपान करणाऱ्यांना पोलिसांनी चांगलाच दम भरला. तसेच बिअर शॉप चालकांनाही स्पष्ट शब्दांत ताकीद देण्यात आली की, दुकानासमोर अथवा परिसरात कोणालाही मद्यप्राशन करू देऊ नये. नियमांचे उल्लंघन झाल्यास संबंधितांवर कायदेशीर कारवाई करण्यात येईल, असा इशारा देण्यात आला.
साईबाबांच्या पवित्र शिर्डी नगरीत कायदा व सुव्यवस्था कायम राखण्यासाठी अशा प्रकारच्या कारवाया यापुढेही सुरू राहणार असल्याचे पोलिसांकडून सांगण्यात आले.
