शिर्डी | प्रतिनिधी :
देशाचा ८० वा स्वातंत्र्य दिन शिर्डी नगरपरिषद कार्यालयात उत्साहपूर्ण आणि देशभक्तीमय वातावरणात साजरा करण्यात आला. यावेळी शिर्डी नगरपरिषदेच्या माननीय नगराध्यक्ष जयश्रीताई थोरात यांच्या हस्ते सकाळी ध्वजारोहण करण्यात आले.
ध्वजारोहणानंतर उपस्थित मान्यवरांनी राष्ट्रध्वजाला मानवंदना देत राष्ट्रगीत गायले. संपूर्ण परिसर ‘भारत माता की जय’, ‘वंदे मातरम्’च्या घोषणांनी दुमदुमून गेला. स्वातंत्र्य दिनाच्या निमित्ताने देशासाठी बलिदान देणाऱ्या स्वातंत्र्यसैनिकांना तसेच देशाच्या सुरक्षेसाठी प्राणांची आहुती देणाऱ्या वीर जवानांना यावेळी अभिवादन करण्यात आले.
या कार्यक्रमास उपनगराध्यक्ष, सर्व नगरसेवक, नगरपरिषद अधिकारी-कर्मचारी तसेच शिर्डी शहरातील ग्रामस्थ मोठ्या संख्येने उपस्थित होते. उपस्थित मान्यवरांनी नागरिकांना स्वातंत्र्य दिनाच्या शुभेच्छा देत देशाच्या विकासासाठी आणि शिर्डी शहराच्या सर्वांगीण प्रगतीसाठी एकजुटीने कार्य करण्याचे आवाहन केले.
उत्साह, राष्ट्रप्रेम आणि एकतेच्या वातावरणात पार पडलेल्या या कार्यक्रमामुळे नगरपरिषद परिसरात स्वातंत्र्य दिनाचा उत्साह पाहायला मिळाला.
