शिर्डी, दि. १ —
श्री साईबाबांवर देश-विदेशातील कोट्यवधी भाविकांची अढळ श्रद्धा असून, ही श्रद्धा केवळ शब्दांत नव्हे तर कृतीतूनही प्रकट होत असते. श्रद्धा, समर्पण आणि भक्तिभाव यांचा अद्वितीय संगम नववर्षाच्या पहिल्याच दिवशी शिर्डीत अनुभवास आला. हरियाणा राज्यातील फरीदाबाद येथील निस्सीम साईभक्त श्री. प्रदीप मोहंती व सौ. प्रतिमा मोहंती यांनी श्री साईबाबांच्या चरणी अत्यंत आकर्षक, नक्षीकामयुक्त सुवर्ण-हिरा जडीत मुकुट भक्तिभावाने अर्पण केला.
सदर मुकुटाचे एकूण वजन ६५५ ग्रॅम असून, त्यामध्ये सुमारे ५८५ ग्रॅम शुद्ध सोने वापरण्यात आले आहे. तसेच या मुकुटात अंदाजे १५३ कॅरेट मौल्यवान हिरे जडवण्यात आले असून, उत्कृष्ट कारागिरी, बारकावे आणि सौंदर्य यांचे अप्रतिम दर्शन घडते. पारंपरिक भारतीय शिल्पकलेचा ठसा लाभलेल्या या मुकुटावर केलेले नक्षीकाम भक्तांचे लक्ष वेधून घेत आहे.
नववर्षाच्या मंगलमय वातावरणात साईचरणी अर्पण करण्यात आलेला हा मुकुट श्री साईबाबा संस्थानचे मुख्य कार्यकारी अधिकारी श्री. गोरक्ष गाडीलकर यांच्याकडे विधिवत सुपूर्द करण्यात आला. संस्थानच्या नियमावलीनुसार आवश्यक नोंद व प्रक्रिया पूर्ण करून हा मौल्यवान दागिना संस्थानच्या ताब्यात देण्यात आला.
या प्रसंगी श्री साईबाबा संस्थानच्या वतीने मुख्य कार्यकारी अधिकारी श्री. गोरक्ष गाडीलकर यांनी दानशूर साईभक्त श्री. प्रदीप मोहंती व सौ. प्रतिमा मोहंती यांचा सन्मानपूर्वक सत्कार केला. त्यांनी आपल्या मनोगतात दानशूर भाविकांचे आभार मानत, “साईभक्तांचा हा श्रद्धाभाव संस्थानच्या सामाजिक, धार्मिक व सेवाभावी कार्यासाठी प्रेरणादायी ठरतो,” असे प्रतिपादन केले.
साईभक्त श्री. प्रदीप मोहंती व सौ. प्रतिमा मोहंती यांनी आपल्या भावना व्यक्त करताना सांगितले की, “श्री साईबाबांच्या कृपेने आमच्या आयुष्यात समाधान, आरोग्य व समृद्धी लाभली. त्या ऋणाची परतफेड म्हणून हा मुकुट साईचरणी अर्पण करण्याचा आम्ही निर्णय घेतला.” त्यांच्या या भक्तिपूर्ण भावनेमुळे उपस्थित भाविक भावूक झाले.
नववर्षाच्या प्रारंभीच साईचरणी अर्पण झालेल्या या सुवर्ण-हिरा जडीत मुकुटामुळे शिर्डीतील भक्तिमय वातावरण अधिकच मंगलमय झाले. साईबाबांवरील अढळ श्रद्धा, समर्पण आणि नि:स्वार्थ भक्तीचे हे दर्शन देश-विदेशातील भाविकांसाठी प्रेरणादायी ठरत असून, साईनामाच्या जयघोषात शिर्डी पुन्हा एकदा भक्तीने न्हाऊन निघाली.
