अहिल्यानगर / श्रीरामपूर | प्रतिनिधी
आगामी निवडणुकांच्या पार्श्वभूमीवर जिल्ह्यातील कायदा व सुव्यवस्था अबाधित ठेवण्यासाठी अहिल्यानगर पोलीस प्रशासनाने कडक भूमिका घेतली असून, चॅप्टर केसेस अंतर्गत 07 सराईत गुन्हेगारांना न्यायालयीन कोठडीत धाडण्यात आले आहे.
विशेष म्हणजे, साईनगरी शिर्डी पोलीस स्टेशन हद्दीतील एक आरोपीही या कारवाईत अडकला असून, शिर्डीत गुन्हेगारीवर पोलीस वचक बसविण्याचा स्पष्ट संदेश देण्यात आला आहे.
महाराष्ट्र शासनाच्या अधिसूचनेनुसार अप्पर पोलीस अधीक्षक, श्रीरामपूर – श्री. सोमनाथ वाघाचौरे यांना कार्यकारी दंडाधिकारी म्हणून अधिकार देण्यात आले आहेत. त्या अनुषंगाने भारतीय नागरिक सुरक्षा संहिता कलम 126 ते 129 अंतर्गत दाखल चॅप्टर केसेसची सुनावणी करण्यात आली.
05 पेक्षा अधिक गुन्हे दाखल असलेल्या सराईत गुन्हेगारांविरोधात कठोर कारवाई करण्याचे आदेश पोलीस अधीक्षक अहिल्यानगर यांनी दिले होते. त्यानुसार श्रीरामपूर, संगमनेर व शिर्डी उपविभागातील विविध पोलीस स्टेशनकडून प्रस्ताव सादर करण्यात आले.
बंधपत्राचा भंग आणि जामीनदाराचा अभाव भोवला
सुनावणीदरम्यान काही आरोपींनी योग्य जामीनदार सादर केले नाहीत, तर काहींनी बंधपत्र करूनही पुन्हा गुन्हे केल्याचे निष्पन्न झाले. त्यामुळे कार्यकारी दंडाधिकारी यांनी 07 आरोपींना न्यायालयीन कोठडीत पाठविण्याचे आदेश दिले.
शिर्डीतील आरोपीवर कारवाई – पोलीसांचा स्पष्ट इशारा
👉 शिर्डी पोलीस स्टेशन हद्दीतील उदय आप्पासाहेब गायकवाड (वय 20) याच्यावर चार गुन्हे दाखल असून, त्यालाही थेट न्यायालयीन कोठडीत पाठविण्यात आले आहे.
👉 साईनगरीत कायदा हातात घेणाऱ्यांना कोणतीही सवलत दिली जाणार नाही, असा ठाम संदेश या कारवाईतून देण्यात आला आहे.
न्यायालयीन कोठडीत रवानगी केलेले आरोपी
- श्रीरामपूर शहर – 03 आरोपी
- राहुरी – 01 आरोपी
- कोपरगाव शहर – 01 आरोपी
- शिर्डी – 01 आरोपी (हायलाईट)
- आश्वी – 01 आरोपी
ही संपूर्ण कारवाई अप्पर पोलीस अधीक्षक तथा कार्यकारी दंडाधिकारी श्रीरामपूर, श्री. सोमनाथ वाघाचौरे यांच्या नेतृत्वाखाली करण्यात आली असून, पुढील काळातही अशाच कठोर कारवाया सुरू राहणार असल्याचा इशारा पोलीस प्रशासनाने दिला आहे.
