शिर्डी (दि. २० ऑक्टोबर २०२५) —
श्री साईबाबा संस्थानच्या श्री साईबाबा हॉस्पिटलमधील न्युरो सर्जरी विभागात प्रथमच दुर्बीण (एंडोस्कोप) तंत्रज्ञानाचा वापर करून रुग्णाच्या मेंदूमधील रक्ताची गाठ यशस्वीपणे काढण्यात आली आहे. ही अभिनव शस्त्रक्रिया पूर्णतः यशस्वी ठरली असून रुग्ण सध्या पूर्णपणे ठणठणीत आहे.
👨⚕️ डॉ. संतोष उणवणे यांच्या मार्गदर्शनाखाली शस्त्रक्रिया
रुग्ण किसन आनंदा पवार (वय ५५, रा. हताणी, ता. उंबरी, जि. नांदेड) हे मेंदूतील रक्तस्रावामुळे उपचारासाठी शिर्डी येथील श्री साईबाबा हॉस्पिटलमध्ये दाखल झाले होते.
न्युरो सर्जन डॉ. संतोष उणवणे यांनी तपासणीनंतर मेंदूमध्ये रक्ताची गाठ असल्याचे निदान केले. रुग्ण आणि नातेवाईकांची संमती घेऊन एंडोस्कोपद्वारे ही शस्त्रक्रिया पार पडली.
शस्त्रक्रियेनंतर रुग्णाला काही तासांतच वेंटिलेटरवरून बाहेर काढण्यात आले असून तो पूर्णपणे बरा आहे.
💉 महात्मा फुले जनआरोग्य योजनेतून मोफत सेवा
ही शस्त्रक्रिया महात्मा ज्योतिराव फुले जन आरोग्य योजनेअंतर्गत पूर्णपणे मोफत करण्यात आली.
डॉ. उणवणे यांनी सांगितले की, अशा सर्व अत्याधुनिक शस्त्रक्रिया शासनाच्या योजनेंतर्गत श्री साईबाबा हॉस्पिटलमध्ये विनामूल्य उपलब्ध आहेत.
गरजूंनी या सेवांचा लाभ घ्यावा, असे आवाहनही त्यांनी केले.
🌟 संस्थानकडून अभिनंदन व गौरव
या यशस्वी शस्त्रक्रियेबद्दल मुख्य कार्यकारी अधिकारी गोरक्ष गाडीलकर (भा.प्र.से),
उपमुख्य कार्यकारी अधिकारी भीमराज दराडे,
आणि उप वैद्यकीय संचालक डॉ. प्रीतम वडगावे यांनी
न्युरो ओटी टीमचे मनःपूर्वक अभिनंदन केले.
या कार्यामुळे श्री साईबाबा हॉस्पिटलच्या वैद्यकीय सेवांमध्ये आणखी एक ऐतिहासिक पाऊल नोंदले गेले आहे.
