लोणी येथील साईभक्त आरती बिहानी यांचे ११.९९ लाखांचे सोन्याचे ब्रोच श्री साईचरणी अर्पण
शिर्डी (प्रतिनिधी) –
श्री साईबाबांवर देश-विदेशातील लाखो भाविकांची अपार श्रद्धा आहे. या श्रद्धेच्या ओढीने भाविक साईबाबांच्या झोळीत श्रद्धेने आणि भक्तीभावाने दान अर्पण करत असतात. अशाच एका भावनिक आणि प्रेरणादायी घटनेत लोणी (ता. राहता) येथील साईभक्त श्रीमती आरती योगेश बिहानी यांनी ११ लाख ९९ हजार ४९८ रुपये किमतीचा, ७३ ग्रॅम ७२० मिलीग्रॅम वजनाचा, आकर्षक नक्षीकाम केलेला सोन्याचा ब्रोच श्री साईचरणी भक्तिभावाने अर्पण केला.
सोन्याच्या या ब्रोचवर सुबक आणि कलात्मक नक्षीकाम करण्यात आले असून, तो साईभक्तीचे आणि समर्पणाचे प्रतीक ठरत आहे. साईबाबांच्या चरणी हे सुवर्ण अर्पण करताना भक्तीभाव, कृतज्ञता आणि श्रद्धेची भावना स्पष्टपणे दिसून आली.
संस्थानकडून साईभक्तांचा सन्मान
या प्रसंगी श्री साईबाबा संस्थानच्या वतीने संस्थानचे मुख्य कार्यकारी अधिकारी श्री. गोरक्ष गाडीलकर यांनी देणगीदार साईभक्त श्रीमती आरती योगेश बिहानी यांचा सत्कार करून त्यांच्या उदात्त भावनेचे कौतुक केले.
श्रद्धा, समर्पण आणि विश्वासाचे प्रतीक
भाविकांच्या श्रद्धेतून साकारलेले असे अर्पण केवळ दान नसून ते श्री साईबाबांवरील अढळ विश्वास, भक्ती आणि सेवाभावाचे प्रतीक आहे. अशा दानातून साईभक्तांची श्रद्धा अधिक दृढ होत असून, साईसंस्थानच्या सामाजिक, वैद्यकीय व सेवाभावी उपक्रमांना बळ मिळत आहे.
🙏 सबका मालिक एक – साईबाबांचा जयघोष!
