शिर्डी/अहिल्यानगर प्रतिनिधी :
राज्यात खळबळ उडवून देणाऱ्या बेकायदेशीर गर्भलिंगनिदान आणि अवैध गर्भपात प्रकरणाच्या तपासात आणखी एक महत्त्वाची घडामोड घडली आहे. या प्रकरणातील आरोपी जालिंदर बोरुडे (रा. घोगरगाव, ता. श्रीगोंदा) याला अटक करून न्यायालयासमोर हजर करण्यात आले असता न्यायालयाने त्याला पाच दिवसांची पोलीस कोठडी सुनावली आहे.
तपास यंत्रणांसमोर आता अनेक गंभीर प्रश्न उभे राहिले आहेत. जालिंदर बोरुडे याने नेमक्या किती गर्भवती महिलांची बेकायदेशीर गर्भलिंगनिदान चाचणी केली? तो स्वतः डॉक्टर नसताना सोनोग्राफी मशीन कसे वापरत होता? या रॅकेटमध्ये आणखी कोणते डॉक्टर, एजंट किंवा इतर व्यक्ती सहभागी आहेत? या सर्व बाबींचा तपास पोलीसांकडून करण्यात येणार आहे.
सोनोग्राफी मशीन फिरते, रॅकेट राज्यभर पसरल्याची शक्यता
तपासादरम्यान धक्कादायक माहिती समोर आली असून बेकायदेशीररित्या खरेदी करण्यात आलेले सोनोग्राफी मशीन घेऊन आरोपी विविध ठिकाणी जाऊन गर्भलिंगनिदान चाचण्या करत असल्याचे निष्पन्न झाले आहे. या रॅकेटमध्ये विविध भागांतील एजंट, काही डॉक्टर तसेच मेडिकल व्यवसायाशी संबंधित व्यक्ती गर्भवती महिलांना आरोपींचे संपर्क क्रमांक आणि पत्ते उपलब्ध करून देत असल्याची माहिती तपासात पुढे आली आहे.
आणखी संशयित रडारवर
यापूर्वी अटक करण्यात आलेल्या आरोपींकडून मिळालेल्या माहितीनुसार आणखी काही संशयित व्यक्तींची नावे समोर आली आहेत. या सर्वांची चौकशी करून त्यांच्याविरोधातही योग्य ती कायदेशीर कारवाई करण्यात येणार असल्याचे सूत्रांनी सांगितले.
दीड महिन्यानंतरही एकालाही जामीन नाही
या प्रकरणातील सर्वात महत्त्वाची बाब म्हणजे आतापर्यंत अटक करण्यात आलेल्या एकाही आरोपीला न्यायालयाकडून जामीन मिळालेला नाही. तपास यंत्रणा अत्यंत बारकाईने पुरावे गोळा करत असून प्रत्येक आरोपीविरुद्ध सबळ पुरावे उपलब्ध होत असल्याचे सांगितले जात आहे. त्यामुळे दीड महिन्यांहून अधिक कालावधी उलटूनही आरोपींना जामीन मिळू शकलेला नाही.
लिंगनिदान रॅकेटमागील मोठे मास्टरमाईंड कोण?
आतापर्यंतच्या तपासात डॉक्टर, एजंट, मेडिकल व्यावसायिक आणि सोनोग्राफी मशीन पुरवठादार यांचे जाळे समोर येत आहे. त्यामुळे या संपूर्ण रॅकेटचा सूत्रधार कोण आहे, याकडे आता सर्वांचे लक्ष लागले असून आगामी तपासात आणखी धक्कादायक खुलासे होण्याची शक्यता व्यक्त केली जात आहे.
