नाशिक पोलीस ठाण्यात दाखल फसवणुकीच्या प्रकरणात नाशिकरोड येथील अतिरिक्त जिल्हा व सत्र न्यायालयाने आरोपी कल्पना खरात यांना अटकपूर्व जामीन मंजूर केला आहे. अतिरिक्त जिल्हा व सत्र न्यायाधीश केदार कोळंबकर यांनी हा महत्त्वपूर्ण आदेश देताना एक लाख रुपयांच्या वैयक्तिक जातमुचलक्यावर तसेच तितक्याच रकमेच्या एक जामीनदाराच्या अटीवर दिलासा दिला आहे.
न्यायालयाने जामीन मंजूर करताना संबंधित आरोपीने तपास यंत्रणेस संपूर्ण सहकार्य करावे, चौकशीसाठी हजर राहावे तसेच तपासात कोणत्याही प्रकारचा अडथळा निर्माण करू नये, अशा अटी घातल्या आहेत.
दरम्यान, सिन्नर प्रकरणात न्यायालयाकडून दिलासा मिळाला असला तरी शिर्डी येथे दाखल असलेल्या कथित फसवणूक प्रकरणात अद्याप न्यायालयीन प्रक्रिया पूर्ण झालेली नसल्याची माहिती समोर येत आहे. संबंधित प्रकरणात जामीनाबाबतची प्रक्रिया प्रलंबित असल्याने या प्रकरणाकडेही सर्वांचे लक्ष लागले आहे.
कायदेतज्ज्ञांच्या मते, एका प्रकरणात अटकपूर्व जामीन मंजूर झाल्याने इतर प्रकरणांमध्ये आपोआप दिलासा मिळत नाही. प्रत्येक गुन्ह्याचा स्वतंत्रपणे विचार करून न्यायालय निर्णय देत असते.
यामुळे सिन्नर प्रकरणात दिलासा मिळाल्यानंतर आता शिर्डीतील प्रकरणात पुढे काय घडते, याकडे नागरिकांसह संबंधित यंत्रणांचे लक्ष लागले आहे.
