शिर्डीत ११५ वा श्रीरामनवमी उत्सव-लाखो साईभक्तांच्या स्वागतासाठी भव्य तयारी पूर्ण!

शिर्डी :
श्री साईबाबा संस्थान ट्रस्ट, शिर्डी यांच्या वतीने यंदाचा ११५ वा श्रीरामनवमी उत्सव बुधवार दि. २५ मार्च ते शुक्रवार दि. २७ मार्च २०२६ या कालावधीत मोठ्या उत्साहात साजरा करण्यात येणार आहे. यासाठी संस्थानकडून सर्व तयारी पूर्ण करण्यात आली असून लाखो साईभक्तांच्या स्वागतासाठी शिर्डी सज्ज झाली आहे.

संस्थानने तब्बल १,६६,५५० सभासदांना निमंत्रण पत्रिका पाठवल्या असून, सुमारे २ लाखांहून अधिक देणगीदार साईभक्तांना SMS व ई-मेलद्वारे आमंत्रित करण्यात आले आहे. त्यामुळे यंदा विक्रमी गर्दी होण्याची शक्यता व्यक्त केली जात आहे.
✨ आकर्षक सजावट आणि भव्य देखावे
मुंबई येथील द्वारकामाई मंडळाच्या वतीने मंदिर परिसरात आकर्षक विद्युत रोषणाई करण्यात येत आहे. तसेच प्रवेशद्वार क्रमांक ४ येथे “साई मयूरद्वार” हा विशेष देखावा उभारण्यात येत असून, बेंगळुरू येथील दानशूर साईभक्त व्यंकटा सुब्रमण्यम यांच्या देणगीतून भव्य फुलांची सजावट केली जाणार आहे.

🚩 पालख्या, पदयात्री आणि निवास व्यवस्था
यावर्षी देशभरातून ९५ पालख्यांची नोंदणी झाली असून हजारो पदयात्री शिर्डीत दाखल होणार आहेत. भाविकांच्या सोयीसाठी –
सुमारे ७५ हजार चौ.फुट मंडप
अतिरिक्त निवासासाठी ५०० रूमचे भक्तनिवास व साई धर्मशाळा
३७,५०० चौ.फुट कापडी मंडप (बिछायत, पाणी, वीजसह)
यासोबतच मुंबई ते शिर्डी मार्गावरील विविध ठिकाणी १.१२ लाख चौ.फुट मंडप उभारण्यात आले आहेत.

🚑 आरोग्य आणि प्रवास सुविधा सज्ज
पदयात्रींसाठी सिन्नर–शिर्डी मार्गावर फिरते वैद्यकीय पथक तैनात करण्यात आले आहे. तसेच विविध ठिकाणी प्रथमोपचार केंद्रे व रुग्णवाहिका सज्ज ठेवण्यात आल्या आहेत.
🚌 वाहतूक आणि प्रसाद व्यवस्था
भाविकांच्या ये-जा करण्यासाठी संस्थानकडून अतिरिक्त बसेसची व्यवस्था करण्यात आली असून, प्रसाद भोजन, लाडू व कॅन्टीन सुविधा सुरळीत ठेवण्यात येणार आहे.

🚔 कडक सुरक्षा बंदोबस्त
उत्सव काळात सुरक्षा व्यवस्थेला विशेष प्राधान्य देण्यात आले आहे.
पोलिस बंदोबस्त
शिघ्र कृती दल
बॉम्ब शोधक पथक
अतिक्रमण व दलाल प्रतिबंधक पथक
यांच्या माध्यमातून संपूर्ण परिसरावर नजर ठेवली जाणार आहे.

🎶 धार्मिक व सांस्कृतिक कार्यक्रमांची रेलचेल
तीन दिवस चालणाऱ्या या उत्सवात –
काकड आरती, पालखी मिरवणुका
श्रीराम जन्म कीर्तन, रथोत्सव
साईभजन, संगीत संध्या, नृत्य कार्यक्रम
अशा विविध धार्मिक व सांस्कृतिक कार्यक्रमांची मेजवानी साईभक्तांना अनुभवायला मिळणार आहे.

📿 इतिहासाची परंपरा कायम
संस्थानचे मुख्य कार्यकारी अधिकारी गोरक्ष गाडीलकर यांनी सांगितले की,
१९११ साली साईबाबांच्या अनुमतीने सुरू झालेला हा उत्सव आजही तेवढ्याच भक्तिभावाने साजरा केला जातो.
🙏 साईभक्तांना आवाहन
सर्व साईभक्तांनी मोठ्या संख्येने उपस्थित राहून उत्सवाची शोभा वाढवावी, असे आवाहन संस्थानकडून करण्यात आले आहे.
✨ शिर्डी सजली… साईनामाच्या गजरात रामनवमी उत्सवासाठी वातावरण भक्तिमय! 🙏