श्रीरामपुर | प्रतिनिधी
दिनांक ०४/०९/२०२५ रोजी श्रीरामपुर येथील अपर पोलीस अधीक्षक कार्यालयास गोपनीय माहिती प्राप्त झाली होती. या माहितीनुसार श्रीरामपुर शहरातील आदर्श लॉज, रंगोली रोड येथे लॉजचा मॅनेजर धीरज प्रमोद बिंगले हा स्वतःच्या आर्थिक फायद्यासाठी महिलांना पैशाचे आमिष दाखवून देहव्यापारास प्रवृत्त करत असून, लॉजमध्ये जागा उपलब्ध करून देत कुंटणखाना (वेश्याव्यवसाय) चालवत असल्याची खात्रीशीर माहिती मिळाली होती.
या माहितीच्या आधारे श्री. सोमनाथ वाघचौरे, अपर पोलीस अधीक्षक, श्रीरामपुर यांनी उपविभागीय पोलीस अधिकारी श्रीरामपुर व पोलीस निरीक्षक श्रीरामपुर शहर यांना तात्काळ कारवाईचे आदेश दिले. त्यानुसार पो.नि. नितीन देशमुख, श्रीरामपुर शहर पोलीस स्टेशन यांनी पोलीस पथक तयार करून बनावट ग्राहक व पंचासह सापळा रचून छापा कारवाई केली.
छाप्यादरम्यान आदर्श लॉजच्या काऊंटरवर धीरज प्रमोद बिंगले (वय ३५, मॅनेजर) हा मिळून आला. तसेच लॉजमध्ये ३ पीडित महिला आढळून आल्या. तपासात मॅनेजर धीरज बिंगले व त्याचा साथीदार अहमद शेख (रा. बाबरपुरी, श्रीरामपुर – फरार) हे महिलांकडून वेश्याव्यवसाय करून ग्राहकांकडून पैसे घेत असल्याचे निष्पन्न झाले.
या प्रकरणी श्रीरामपुर शहर पोलीस स्टेशन येथे गु.र.नं. ८२३/२०२५ अन्वये स्त्रिया व मुली अनैतिक व्यापार प्रतिबंध अधिनियम १९५६ चे कलम ३, ४, ५ व ७ अंतर्गत गुन्हा दाखल करण्यात आला होता. तपासात आणखी चार आरोपी निष्पन्न झाले असून, लॉजचे चालक व मालक यांचाही थेट सहभाग उघडकीस आला आहे.
विशेष म्हणजे, यापूर्वीही दि. १०/०१/२०२४ रोजी याच आदर्श लॉजवर छापा टाकण्यात आला होता व त्यावेळीही गु.र.नं. २०/२०२४ अंतर्गत गुन्हा दाखल करण्यात आला होता. मात्र, वारंवार कारवाई होऊनही लॉज चालक व मालकांच्या वर्तनात कोणतीही सुधारणा झालेली नसल्याचे पोलीस प्रशासनाच्या निदर्शनास आले.
सदर लॉज हे श्रीराम मंदिर, पार्श्वनाथ दिगंबर जैन मंदिर, गणपती मंदिर व नुराणी मस्जिद या धार्मिक स्थळांच्या अगदी नजीक असून, परिसरात निवासी वस्ती, शाळा व महाविद्यालये आहेत. त्यामुळे नागरिक, विद्यार्थी व भाविकांमध्ये असुरक्षिततेचे वातावरण निर्माण झाले होते.
या पार्श्वभूमीवर पोलीस प्रशासनाने मा. जिल्हाधिकारी, अहिल्यानगर यांच्याकडे अनैतिक व्यापार प्रतिबंध अधिनियम १९५६ चे कलम १८ अन्वये आदर्श लॉजचा परवाना रद्द करून लॉज बंद करण्याचा प्रस्ताव सादर केला. त्यानुसार मा. उपविभागीय दंडाधिकारी, श्रीरामपुर यांनी आरोपींकडून खुलासा मागवला. मात्र, सादर केलेला खुलासा समाधानकारक नसल्याने दि. ०९/०२/२०२६ रोजी आदर्श लॉज एक वर्षाच्या कालावधीसाठी बंद करण्याचे व ७ दिवसांत जागा रिकामी करण्याचे आदेश देण्यात आले.
या आदेशानुसार श्रीरामपुर शहर पोलीस स्टेशनकडून सदर लॉज सिलबंद करण्यात आले आहे. सामाजिक शांतता, नैतिकता व सार्वजनिक सुरक्षितता राखण्यासाठी प्रशासनाने हे कडक पाऊल उचलले असून, भविष्यातही ज्या ठिकाणी वेश्याव्यवसाय सुरू असल्याचे व लॉज चालकांचा सहभाग निष्पन्न होईल, त्या ठिकाणी कठोर कायदेशीर कारवाई करून लॉज/हॉटेल बंद करण्यात येणार असल्याचा इशारा देण्यात आला आहे.
ही संपूर्ण कारवाई मा. श्री. सोमनाथ घार्गे (पोलीस अधीक्षक, अहिल्यानगर), श्री. सोमनाथ वाघचौरे (अपर पोलीस अधीक्षक, श्रीरामपुर) व श्री. जयदत्त भवार (उपविभागीय पोलीस अधिकारी, श्रीरामपुर) यांच्या मार्गदर्शनाखाली पो.नि. नितीन देशमुख व श्रीरामपुर शहर पोलीस स्टेशनच्या पथकाने यशस्वीपणे पार पाडली.
