शिर्डी, प्रतिनिधी : सावळीविहीर फाटा परिसरातील एका हॉटेल व्यावसायिकाला पूर्वी पोलीस ठाण्यात तक्रार दिल्याचा राग मनात धरून हॉटेलमध्ये घुसून मारहाण केल्याची धक्कादायक घटना समोर आली आहे. शिवीगाळ, धक्काबुक्की करत जीवे मारण्याची धमकी दिल्याप्रकरणी शिर्डी पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, रमेश देवराम ढवळे (वय ४७, रा. सावळीविहीर, ता. राहाता) यांनी दिलेल्या फिर्यादीनुसार ते सावळीविहीर फाटा येथे एस. व्ही. कॉर्नर नावाचे हॉटेल चालवून कुटुंबाचा उदरनिर्वाह करतात.
दि. ३१ जुलै २०२६ रोजी रात्री सुमारे ९ वाजण्याच्या सुमारास आरोपी साईनाथ दिलीप कुसळकर (रा. सावळीविहीर, ता. राहाता) हा मद्यधुंद अवस्थेत हॉटेलवर आला. “तू माझ्याविरुद्ध पोलीस स्टेशनला तक्रार का दिली? पोलीस माझं काही वाकडं करू शकत नाहीत. तू इथे कसा राहतोस आणि हॉटेल कसं चालवतोस ते पाहतोच,” अशी धमकी देत त्याने फिर्यादीला अश्लील शिवीगाळ करून मारहाण केल्याचे फिर्यादीत नमूद करण्यात आले आहे.
यावेळी आरोपीने फिर्यादी तसेच त्यांच्या पत्नीचे हातपाय तोडण्याची आणि जीवे मारण्याची धमकी दिल्याचाही आरोप करण्यात आला आहे.
या प्रकरणी शिर्डी पोलीस ठाण्यात संबंधित आरोपीविरुद्ध गुन्हा दाखल करण्यात आला असून, पुढील तपास शिर्डी पोलीस करत आहेत.
