श्री साईबाबा संस्थान, शिर्डी येथील समाधी मंदिर परिसरात साईभक्तांसाठी पुन्हा एकदा “श्रद्धा आणि सबुरी”चा अनुभव देणारी हृदयस्पर्शी घटना घडली आहे. सुरक्षा विभागातील कर्तव्यदक्ष कर्मचारी श्री. संदीप धिवर यांना मंदिर परिसरात एक सोन्याचे ब्रेसलेट आढळून आले. क्षणाचाही विलंब न करता त्यांनी ते अत्यंत प्रामाणिकपणे तात्काळ सुरक्षा कार्यालयात जमा केले.
सदर सोन्याच्या ब्रेसलेटचे वजन 11.390 ग्रॅम असून त्याची अंदाजे किंमत सुमारे 1 लाख 29 हजार रुपये इतकी आहे. सुरक्षा विभागाकडून करण्यात आलेल्या चौकशीनंतर हे ब्रेसलेट ईश्वर रामेश्वरम लड्डा, रा. बार्शी, जि. सोलापूर यांच्या कुटुंबीयांचे असल्याचे निष्पन्न झाले.
मंदिर परिसरात ब्रेसलेट हरवल्याचे लक्षात आल्यानंतर उपस्थित साईभक्तांनी संबंधित कुटुंबीयांना सुरक्षा कार्यालयात चौकशी करण्याचा सल्ला दिला. सुरक्षा कार्यालयात आल्यानंतर ब्रेसलेट सुरक्षितरीत्या सापडल्याची माहिती मिळताच कुटुंबीय भावूक झाले. त्यांनी सुरक्षा कर्मचारी श्री. संदीप धिवर यांच्याकडे पाहत उद्गार काढले,
“आज तुमच्यात आम्हाला साईबाबा दिसले. बाबांनी आमची श्रद्धा अढळ ठेवली.”
या घटनेमुळे श्री साईबाबा संस्थानमधील सुरक्षा कर्मचाऱ्यांची प्रामाणिकता, कर्तव्यनिष्ठा आणि साईभक्तांप्रती असलेली निस्वार्थ सेवा पुन्हा एकदा अधोरेखित झाली आहे. श्रद्धा आणि सबुरीचा संदेश प्रत्यक्ष कृतीतून देणाऱ्या या अनुकरणीय कार्याबद्दल संस्थानचे मुख्य कार्यकारी अधिकारी मा. श्री. गाडीलकर साहेब तसेच उपमुख्य कार्यकारी अधिकारी मा. श्री. दराडे साहेब यांनी सुरक्षा कर्मचारी श्री. संदीप धिवर यांचे मनःपूर्वक अभिनंदन केले आहे.
साईबाबांच्या पवित्र भूमीत आजही माणुसकी, प्रामाणिकपणा आणि भक्ती जिवंत असल्याचे हे प्रेरणादायी उदाहरण साईभक्तांच्या मनात श्रद्धेचा नवा विश्वास निर्माण करणारे ठरत आहे. 🙏
