शिर्डी, प्रतिनिधी : शिर्डीतील साई फेज-२ परिसरात रिक्षातून प्रवास करणाऱ्या ७५ वर्षीय वृद्धाला मारहाण करून त्याच्याकडील रोख रक्कम लुटल्याप्रकरणी शिर्डी पोलिसांनी सराईत गुन्हेगार रहीम पठाणसह तिघांना अटक केली आहे. आरोपींना न्यायालयात हजर केले असता न्यायालयाने त्यांना दोन दिवसांची पोलीस कोठडी सुनावली आहे.
फिर्यादी विश्वनाथ लिंबा मैद (वय ७५, रा. मैदवाडी, ता. धारूर, जि. बीड) हे आपल्या नातू अंकुश अशोक मैद याच्यासोबत उपचारासाठी शिर्डीत आले होते. ३ ऑगस्ट रोजी रात्री सुमारे ९.३० वाजता ते श्री साईनाथ रुग्णालयाजवळून साई फेज-२ येथे जाण्यासाठी रिक्षात बसले. रिक्षात आधीच तीन जण बसलेले होते. रिक्षाचालकाने “पुढील स्टॉपवर उतरतील” असे सांगून त्यांना बसविले.
मात्र, रिक्षा सुरू झाल्यानंतर त्या तिघांनी वृद्ध व त्यांच्या नातवाला मारहाण करण्यास सुरुवात केली. विश्वनाथ मैद यांच्या हातातील पिशवी हिसकावून त्यातील ७,२०० रुपये रोख जबरदस्तीने काढून घेतले. त्यानंतर दोघांना रिक्षातून खाली उतरवून आरोपी घटनास्थळावरून पसार झाले.
या प्रकरणी शिर्डी पोलीस ठाण्यात गुन्हा क्र. ६८०/२०२६ नोंद करण्यात आला असून भारतीय न्याय संहिता (BNS) कलम ३०८(६) व ३(५) अन्वये गुन्हा दाखल करण्यात आला आहे.
तपासादरम्यान पोलिसांनी सराईत गुन्हेगार रहीम पठाण याच्यासह अन्य दोन आरोपींना अटक केली. तिन्ही आरोपींना न्यायालयात हजर केले असता न्यायालयाने पुढील तपासासाठी दोन दिवसांची पोलीस कोठडी मंजूर केली आहे. या गुन्ह्यात आणखी काही आरोपींचा सहभाग आहे का, तसेच अशाच प्रकारच्या इतर घटनांशी या टोळीचा संबंध आहे का, याचा तपास शिर्डी पोलीस करीत आहेत.
