नाशिक/येवला : येवला तालुका पोलीस ठाण्यात दाखल असलेल्या गुन्ह्यात तक्रारदाराच्या भावाला आरोपी न करण्यासाठी व अटक न करण्याच्या मोबदल्यात लाचेची मागणी केल्याप्रकरणी तत्कालीन पोलीस उपनिरीक्षकासह तिघांविरुद्ध लाचलुचपत प्रतिबंधक विभागाने (एसीबी) गुन्हा दाखल केला आहे.
या प्रकरणातील लोकसेवक आरोपी हर्षवर्धन दिलीप बहीर, तत्कालीन पोलीस उपनिरीक्षक, येवला तालुका पोलीस ठाणे (सध्या श्रीरामपूर शहर पोलीस ठाणे, जि. अहिल्यानगर) आहेत. तसेच सुनिल शिवाजी बोराडे (रा. पाटोदा, ता. येवला) आणि जगदीश तुकाराम बोराडे या दोघा खासगी व्यक्तींविरुद्धही गुन्हा दाखल करण्यात आला आहे.
एसीबीने दिलेल्या माहितीनुसार, तक्रारदाराच्या भावाला गुन्ह्यात आरोपी न करण्यासाठी व अटक टाळण्याच्या बदल्यात सुरुवातीला ₹४ लाखांची लाच मागण्यात आली. तडजोडीनंतर ही रक्कम ₹२ लाख ५० हजार इतकी निश्चित करण्यात आली. त्यापैकी ₹५० हजारांची रक्कम सुनिल बोराडे याने फोन-पेद्वारे स्वीकारल्याचा आरोप आहे.
तसेच, ही लाचेची रक्कम पोलीस उपनिरीक्षक हर्षवर्धन बहीर यांच्यापर्यंत पोहोचविण्यासाठी जगदीश बोराडे याने तक्रारदाराला प्रोत्साहन दिल्याचे तपासात निष्पन्न झाल्याचे एसीबीने म्हटले आहे.
या प्रकरणाची पडताळणी तत्कालीन पोलीस निरीक्षक पूनम केदार यांनी केली. पोलीस निरीक्षक योगेश भास्कर शिंदे यांनी गुन्हा दाखल केला असून पुढील तपास पोलीस निरीक्षक राहुल कुमार नाईक करीत आहेत.
