शिर्डी (प्रतिनिधी) फाल्गुन शुद्ध पौर्णिमा म्हणजेच होळी पौर्णिमा. होळी पौर्णिमेचं दुसरं नाव म्हणजे हुताशनी पौर्णिमा. होळी हा सण शहरात तसंच खेड्या-पाड्यातून मोठ्या आनंद आणि उत्साहानं साजरा केला जातो. तसा तो साईबाबांच्या शिर्डीतही मोठ्या भक्तीभावानं साजरा केला जातो. आज गुरुवारी सकाळी साडेअकराला साईबाबांच्या गुरुस्थान समोर साईबाबा संस्थानच्या वतीनं होळीचं पूजन करून दहन करण्यात आलं.
तर साईंच्या सानिध्यात होळी साजरी करण्यासाठी देश-विदेशातून भाविक शिर्डीत दाखल झाले होते. साईबाबांच्या शिर्डीत प्रत्येक उत्सव मोठ्या भक्ती भावाने साजरा केला जातो. साईबाबा मंदिर परिसरातील गुरुस्थान मंदिरासमोर पारंपरिक पद्धतीनं होळीचं दहन करण्यात आलं. साईबाबा संस्थानचे मुख्य कार्यकारी अधिकारी गोरक्ष गाडीलकर यांनी सपत्नीक होळीची पूजा करून होळीचं दहन केलं. तसंच पालथ्या हातानं शंखध्वनी अर्थात बोंब मारत मनातील अनिष्ठ प्रवृत्ती शांत होवो,
अशी प्रार्थना साईबाबा संस्थान आणि भक्तांनी साईबाबांच्या चरणी केल्याची माहिती माजी विश्वस्त सचिन तांबे यांनी दिली.
साई मंदिरात पारंपरिक पद्धतीनं होळीचं दहन
समाधी मंदिर परिसरात आकर्षक फुलांची सजावट : होळीचा सण हा आज संपूर्ण भारतभर साजरा केला जात आहे. होळी साजरी करण्याची परंपरा पूर्वकाळापासून चालत आली आहे.
साईबाबांच्या शिर्डीतही होळी पूजन करून दहन करण्याची प्रथा साईबाबांच्या काळापासून सुरू आहे. ही परंपरा जोपासत साईबाबा संस्थानच्या वतीनं गुरुस्थान समोर मध्यान्ह आरती अगोदर होळीची विधीवत पूजा करून होळीचं दहन केलं. तर सायंकाळी द्वारकामाई मंदिरासमोर साईबाबा संस्थान, साईभक्त आणि ग्रामस्थ सामूहिक होळीचं दहन करतात. आज होळी असल्यानं साईबाबांना पुरणपोळीचा नैवेद्य दाखवण्यात आला. त्यानंतर मध्यान्ह आरती पार पडली.
यावेळी साईबाबाच्या मूर्तीला साखरेनं बनवलेला गाठीची माळ घालण्यात आली. तर आज होळीच्या निम्मितानं युनायटेड किंडममध्ये राहत असलेल्या दानशूर साईभक्त अखिल गुप्ता यांच्या देणगीतून समाधी मंदिर परिसरात आकर्षक फुलांची सजावट करण्यात आली. होळी निमित्ताने साई भक्तांनी दर्शन घेतले.
