भारतीय T20 क्रिकेट संघाचा कर्णधार तथा धडाकेबाज फलंदाज सूर्यकुमार यादव आज 14 मार्च (शुक्रवार) रोजी धुळवडच्या पार्श्वभुमीवर सपत्नीक शिर्डीत येत साईबाबांच्या चरणी नतमस्तक झाला आहे.
आयपीएल सुरु होत असल्यानं दर्शनाला : भारतीय T20 क्रिकेट संघाचा आक्रमक फलंदाज सूर्यकुमार यादवनं पत्नी देवीशा शेट्टी समवेत आज शुक्रवारी माध्यन्ह आरती पुर्वी शिर्डीत साईंच्या समाधीचं मनोभावे दर्शन घेतलं. मागील दोन महिन्यापुर्वी देखील सूर्यकुमार शिर्डीत दर्शनासाठी आला होता.
त्यानंतर आता आयपीएल सुरु होत असल्यानं त्यानं साई बाबांचं दर्शन घेतलंय. आयपीएल सुरु झाल्यानंतर साई दर्शनासाठी येता येणार नसल्यानं आज सपत्नीक साईबाबांच्या दर्शनासाठी आल्याचं सूर्या म्हणाला. यावेळी सूर्यकुमार आणि पत्नी देविशानं साई बाबांच्या द्वारकमाई व गुरुस्थान मंदिरात जावून दर्शन घेतलं.
तसंच साई दर्शनानंतर साईबाबा संस्थानचे उपमुख्य कार्यकारी अधिकारी किशोर दराडे यांनी सूर्यकुमारचं सपत्नीक शॉल आणि साईंची मूर्ती देवून सत्कार केला. शिवाय 22 मार्चपासून सुरु होणाऱ्या आयपीएलसाठी सूर्यकुमार यादवला संस्थानच्या वतीनं शुभेच्छा देण्यात आल्या. यावेळी साई मंदिर प्रमुख विष्णू थोरात व जनसंपर्क प्रमुख तुषार शेळके उपस्थित होते.
