शिर्डी | श्री साईनाथ रुग्णालयात दुर्मिळ व जटिल शस्त्रक्रियेला यश
अहिल्यानगर जिल्‍ह्यातील राजुरी, येथील रुग्ण सरिता सुनिल पंडीत, वय 40 यांच्या पोटात तब्बल 1.5 किलो वजनाची भलीमोठी गाठ आढळून आली होती. गेल्या काही महिन्यांपासून अनेक नामांकित रुग्णालयांचे उंबरठे झिजवल्यानंतरही पोटातील गाठ अतिशय गुंतागुंतीच्या ठिकाणी असल्याने कोणतीही शस्त्रक्रिया करण्यास अनेक डॉक्टरांनी नकार दिला. वाढत्या धोक्यामुळे रुग्ण व कुटुंबीय मोठ्या चिंतेत होते. शेवटी त्यांनी आशेने श्री साईनाथ रुग्णालय, शिर्डी येथे धाव घेतली. येथील स्त्रीरोग तज्ज्ञ डॉ. पुजा सिंग यांनी सखोल तपासणीनंतर ही धोकादायक शस्त्रक्रिया दुर्बिणीद्वारे (लॅप्रोस्कोपी) करण्याचा धाडसी निर्णय घेतला. रुग्ण व त्यांच्या नातेवाईकांनीही संभाव्य धोका स्वीकारत शस्त्रक्रियेला संमती दिली.
भूलतज्ज्ञ डॉ. महेंद्र तांबे यांच्या सहकार्याने, सर्जरी विभागाच्या टीमसह ही अतिशय अवघड व जटिल शस्त्रक्रिया करण्यात आली. रुग्णास त्रास न देता, बिनटाक्याच्या पद्धतीने पूर्ण 1.5 किलोची विशाल गाठ एकाच प्रयत्नात यशस्वीपणे काढण्यात डॉक्टरांना यश आले. अशा प्रकारची दुर्मिळ व आव्हानात्मक शस्त्रक्रिया श्री साईनाथ रुग्णालयात यशस्वीरीत्या पार पडल्याची माहिती डॉ. पुजा सिंग यांनी दिली.
रुग्णालय प्रशासनाद्वारे ही शस्त्रक्रिया पूर्णपणे मोफत करण्यात आली. शस्त्रक्रियेनंतर रुग्ण पूर्णपणे बरा झाला असून सुरक्षितपणे घरी परतला आहे. त्यामुळे रुग्ण व त्यांच्या कुटुंबीयांचा आनंद गगनात मावेनासा झाला.
या उल्लेखनीय यशाबद्दल श्री साईबाबा संस्थानचे मुख्य कार्यकारी अधिकारी गोरक्ष गाडीलकर (भा.प्र.से), उप मुख्य कार्यकारी अधिकारी भिमराज दराडे, रुग्णालयाचे वैद्यकीय संचालक ले. कर्नल डॉ. शैलेश ओक (से.नि.), उप वैद्यकीय संचालक डॉ. प्रितम वडगावे, प्र. वैद्यकीय अधीक्षक डॉ. मैथीली पितांबरे, आदींनी डॉ. पुजा सिंग व त्यांच्या संपूर्ण टीमचे अभिनंदन केले आहे.
श्री साईनाथ रुग्णालय श्रद्धेसोबतच आरोग्यसेवेतील उत्तम सेवा व चमत्कारिक कार्यासाठीही आपली वेगळी ओळख निर्माण करीत असल्याचे मत व्यक्त करण्यात आले.
