मुंबई, दि. १६ : शिवसेना (ठाकरे गट) पक्षातील खासदार फुटून संसदेत स्वतंत्र गट स्थापन करणार असल्याच्या चर्चांनी गेल्या काही दिवसांपासून राजकीय वर्तुळात खळबळ उडवून दिली होती. ठाकरे गटाच्या ९ खासदारांपैकी ५ खासदार बंडखोरीच्या तयारीत असल्याच्या अफवा पसरल्याने पक्षात अस्वस्थतेचे वातावरण निर्माण झाले होते. मात्र, पक्षाचे नेते संजय राऊत यांनी या सर्व चर्चा निराधार असल्याचे स्पष्ट करत वादावर पडदा टाकला आहे.
‘मातोश्री’वर महत्त्वाची बैठक
चार दिवसांपूर्वी उद्धव ठाकरे यांच्या उपस्थितीत ‘मातोश्री’ निवासस्थानी महत्त्वाची बैठक पार पडली. या बैठकीला काही खासदार प्रत्यक्ष उपस्थित होते, तर काहींनी दूरस्थ पद्धतीने सहभाग नोंदविला.
खासदारांच्या भावनिक शपथा
बैठकीदरम्यान सर्व खासदारांनी उद्धव ठाकरेंच्या नेतृत्वावर पूर्ण विश्वास व्यक्त केला. आपण पक्षासोबतच राहणार असल्याची ग्वाही देताना अनेक खासदार भावूक झाले.
काही खासदारांनी आई-वडील व मुलांची शपथ घेतली, तर काहींनी आई भवानी, तुळजाभवानी आणि साईबाबांच्या नावाने शपथ घेत पक्षाशी व हिंदुत्वाच्या विचारांशी निष्ठावंत राहण्याचे आश्वासन दिले.
संजय राऊत यांचा टोला
या बैठकीबाबत माहिती देताना संजय राऊत म्हणाले, “ज्याप्रमाणे लोक दूरस्थ पद्धतीने पूजा करतात, त्याचप्रमाणे काही खासदारांनी दूरस्थ माध्यमातून शपथ घेतली. पक्ष सोडण्याचा कोणाचाही विचार नाही.”
यामुळे ठाकरे गटातील खासदार फुटीच्या चर्चांना सध्या तरी पूर्णविराम मिळाल्याचे मानले जात आहे.
