शिर्डी शहर व परिसरात महिलांच्या गळ्यातील सोनसाखळ्या हिसकावून नागरिकांमध्ये भीतीचे वातावरण निर्माण करणाऱ्या चेन स्नॅचिंग टोळ्यांवर शिर्डी पोलिसांनी मोठा घाव घालत दोन वेगवेगळ्या टोळ्यांतील आरोपींना जेरबंद केले आहे. आरोपींकडून चोरीस गेलेले सोन्याचे दागिने, गुन्ह्यात वापरलेली दुचाकी आणि इतर मुद्देमाल असा सुमारे दोन लाख रुपयांहून अधिक किमतीचा ऐवज जप्त करण्यात आला आहे.
दि. २७ जून २०२६ रोजी हॉटेल ऋषिकेश परिसरात एका ज्येष्ठ महिलेच्या गळ्यातील सोन्याची साखळी हिसकावून चोरटे पसार झाले होते. या घटनेप्रकरणी भारतीय न्याय संहिता, २०२३ अंतर्गत गुन्हा दाखल करण्यात आला होता. त्यानंतर शिर्डी पोलिसांनी तांत्रिक विश्लेषण, सीसीटीव्ही फुटेज, गोपनीय माहिती आणि स्थानिक माहितीदारांच्या मदतीने आरोपींचा माग काढत त्यांना अटक केली.
या तपासात सुमित अशोक बोमले, ऋषिकेश पद्मिरे आणि ओमकार शरद भोसले (रा. ता. इगतपुरी, जि. नाशिक) ही टोळी निष्पन्न झाली. यापैकी सुमित बोमले आणि ऋषिकेश पद्मिरे यांना अटक करण्यात आली असून त्यांच्या चौकशीत चोरीस गेलेली ४० ग्रॅम १४० मिलीग्रॅम वजनाची सोन्याची साखळी हस्तगत करण्यात आली. गुन्ह्यात वापरलेली दुचाकीही जप्त करण्यात आली आहे.
याच तपासादरम्यान १५ जून २०२६ रोजी घडलेल्या आणखी एका चेन स्नॅचिंग प्रकरणाचाही उलगडा करण्यात आला. या गुन्ह्यातील आरोपी अनिल सुभाष चिंतामणी याला अटक करण्यात आली असून त्याच्या माहितीवरून प्रकाश गोंदके याचेही नाव समोर आले आहे. या प्रकरणात चोरीस गेलेल्या १२ ग्रॅम सोन्यापैकी ४ ग्रॅम सोने पोलिसांनी हस्तगत केले असून उर्वरित मुद्देमालाचा शोध सुरू आहे.
उपविभागीय पोलीस अधिकारी अमोल भारती यांनी सांगितले की, शिर्डी पोलीस ठाण्याच्या हद्दीत यावर्षी घडलेल्या ९ चेन स्नॅचिंगच्या घटनांपैकी तब्बल ७ गुन्ह्यांचा उलगडा करण्यात पोलिसांना यश आले आहे. उर्वरित दोन घटनांचाही लवकरच छडा लावला जाईल, असा विश्वास त्यांनी व्यक्त केला.
ही संपूर्ण कारवाई पोलीस अधीक्षक एम. सुदर्शन, अपर पोलीस अधीक्षक सोमनाथ वाकचवरे, उपविभागीय पोलीस अधिकारी अमोल भारती यांच्या मार्गदर्शनाखाली शिर्डी पोलीस ठाण्याचे पोलीस निरीक्षक रणजीत गलांडे आणि त्यांच्या डीबी पथकाने यशस्वीरीत्या पार पाडली.
या कारवाईमुळे शिर्डी शहरातील चेन स्नॅचर्सचे धाबे दणाणले असून नागरिकांमध्ये सुरक्षिततेची भावना अधिक बळकट झाली आहे. तसेच नागरिकांनी आपल्या मौल्यवान दागिन्यांची काळजी घ्यावी आणि कोणतीही संशयास्पद घटना घडल्यास तात्काळ शिर्डी पोलीस ठाण्याशी संपर्क साधावा, असे आवाहन पोलिसांनी केले आहे.
