कोपरगाव तालुक्यातील रांजणगाव देशमुख येथे नुकतेच कोपरगाव कृषी उत्पन्न बाजार समितीच्या दोन कोटी रुपये मूल्य असलेल्या उपबाजार आवाराचे भूमिपूजन करण्यात आले. मात्र, हा सोहळा ज्या गावात पार पडला, त्या गावातील सरपंच जिजाबाई गजानन मते आणि बहुसंख्य ग्रामस्थांनीच कार्यक्रमाकडे पाठ फिरवल्याने सगळीकडे चर्चेचे वारे सुरू आहेत.
भूमिपूजन झालेल्या जागेचे मूल्य जवळपास दोन कोटी रुपये आहे, पण आश्चर्य म्हणजे ग्रामपंचायतीला या व्यवहारातून एक रुपयाचंही उत्पन्न मिळणार नाही अशी धक्कादायक माहिती समोर आली आहे.
विश्वसनीय सूत्रांच्या माहितीनुसार, या जागेबाबत १७ ऑक्टोबर २०२५ रोजी २१ वर्षांचा करार करण्यात आला असून, भाड्याबाबत कोणताही स्पष्ट उल्लेख करण्यात आलेला नाही. फक्त “भाडे सार्वजनिक बांधकाम विभागाने ठरवेल” एवढं नोंदवलं गेलं आहे.
🏗️ राजकीय आकस आणि स्थानिकांचा संताप
या उपबाजारासाठी गेली २५ वर्षे जवळके गावाची मागणी होती. अकरा गावांनी एकमुखाने जवळकेच योग्य ठिकाण असल्याचा ठराव करून पाठवला होता.
मात्र, स्थानिक राजकीय आकसातून अयोग्य ठिकाणी – रांजणगाव देशमुख येथे प्रकल्प वळवण्यात आल्याचा आरोप होत आहे.
अगदी या गावाने संगमनेर तालुक्यात विलिनीकरणासाठी ठराव घेतलेला असतानाही कोपरगाव बाजार समितीने येथे प्रकल्प राबवणे म्हणजे “हितसंबंधासाठी गावाशी विश्वासघात” असा आरोप नागरिक करत आहेत.
🚫 सरपंचांचा अपमान, नागरिकांचा बहिष्कार
ग्रामपंचायतीचे प्रथम नागरिक असलेल्या सरपंचांचा कार्यक्रम पत्रिकेत उल्लेखही नव्हता, तसेच कोनशिलेवर त्यांचं नावदेखील टाकलेलं नव्हतं.
हा अपमान सहन न झाल्याने सरपंच जिजाबाई मते व ग्रामस्थांनी भूमिपूजनास बहिष्कार टाकला.
“आमचं गाव, आमची जमीन, पण आमचा सन्मान नाही!” — या भावनेतून अनेक ग्रामस्थांनी आपली नाराजी व्यक्त केली.
⚖️ स्थानिक नेते आणि नागरिकांचा प्रश्न — “कोणासाठी काम करतंय बाजार समिती?”
गावातील वकील संघाचे सदस्य ऍड. योगेश खालकर म्हणाले,
“अधिक्रमण, अपमान आणि आर्थिक तोटा — सगळं आमचं, पण फायदा इतरांचा! हा व्यवहार पारदर्शक नाही. बाजार समिती कोणासाठी काम करतेय, हा प्रश्न प्रत्येक ग्रामस्थ विचारतोय.”
दरम्यान, गावातील कार्यकर्त्यांनी म्हटलं आहे की, “दलालाचे हात कोळशाने काळे” — ही म्हण आज रांजणगाव देशमुखात खरी ठरत आहे.
🗣️ गावात संतापाची लाट
या प्रकरणानंतर रांजणगाव देशमुखमध्ये विरोध आणि संतापाची लाट पसरली आहे.
दोन कोटींचा प्रकल्प झाला खरा, पण गावाच्या हक्काचा सन्मान आणि आर्थिक फायदा दोन्ही गेला.
ग्रामस्थ म्हणतात — “गावाचा विकास नावाखाली केवळ काही जणांची पोळी भाजली गेली.”
