शिर्डी | प्रतिनिधी
शिर्डीच्या साईबाबांवर देश-विदेशातील लाखो भाविकांची अढळ श्रद्धा आहे. ही श्रद्धा केवळ दर्शनापुरती मर्यादित न राहता सेवा, त्याग आणि दानाच्या माध्यमातून सातत्याने व्यक्त होत असते. ठाणे येथील साईभक्त संतोष नार्वेकर यांच्या कुटुंबीयांनी साईबाबांच्या चरणी ११ लाख रुपये किमतीचे दोन सोन्याचे दिवे अर्पण करून आपल्या श्रद्धा आणि कृतज्ञतेची प्रचिती दिली.
पुत्रप्राप्तीसाठी केला नवस… मिळाला दुहेरी आनंद
दोन वर्षांपूर्वी संतोष नार्वेकर यांनी शिर्डी साईबाबांच्या चरणी पुत्रप्राप्तीसाठी नवस केला होता. वंशाला दिवा मिळावा अशी मनोभावे प्रार्थना त्यांनी केली होती.
नार्वेकर कुटुंबाच्या श्रद्धेनुसार, साईबाबांच्या आशीर्वादाने त्यांच्या घरी एक नव्हे तर एक मुलगी आणि एक मुलगा असा दुहेरी आनंद लाभला. वरद आणि रुंदा या दोन्ही लेकरांसह नार्वेकर कुटुंबीय आज शिर्डीत दर्शनासाठी आले होते.
माध्यान्ह आरतीस उपस्थित राहून त्यांनी साईबाबांच्या समाधीचं मनोभावे दर्शन घेतलं आणि कुटुंबासह चरणी नतमस्तक होत आशीर्वाद घेतले.
कृतज्ञतेपोटी सोन्याचे दिवे अर्पण
“मी साईबाबांकडे एक पुत्र मागितला होता. मात्र बाबांनी आम्हाला एक मुलगी आणि एक मुलगा अशी दोन अपत्ये देऊन आमचे कुटुंब पूर्ण केले. ही साईकृपेची देणगी आहे,” अशी भावना संतोष नार्वेकर यांनी व्यक्त केली.
नवस फेडण्यासाठी त्यांनी सुमारे सात तोळे वजनाचे आणि अंदाजे ११ लाख रुपये किमतीचे दोन सोन्याचे दिवे साईबाबांच्या चरणी अर्पण केले. ही देणगी त्यांनी संस्थानकडे सुपूर्द केली.
संस्थानकडून सत्कार
दर्शनानंतर श्री साईबाबा संस्थानचे मुख्य कार्यकारी अधिकारी गोरक्ष गाडीलकर यांनी नार्वेकर कुटुंबीयांचा शाल आणि साईबाबांची मूर्ती देऊन सत्कार केला.
नार्वेकर परिवाराने आणलेले सोन्याचे दिवे अधिकृतपणे संस्थानच्या स्वाधीन करण्यात आले.
श्रद्धा, विश्वास आणि कृतज्ञतेचे प्रतीक
साईबाबांच्या चरणी अर्पण केलेले हे दोन दिवे केवळ सोन्याचे नसून श्रद्धा, विश्वास आणि कृतज्ञतेचे प्रतीक असल्याची भावना नार्वेकर कुटुंबीयांनी व्यक्त केली.
शिर्डीत दररोज हजारो भक्त विविध स्वरूपात सेवा व दान करत असतात. नार्वेकर कुटुंबीयांच्या या दानामुळे साईभक्तीतून व्यक्त होणाऱ्या कृतज्ञतेचा आणखी एक सुंदर अध्याय लिहिला गेला आहे.
🕉 साई राम 🙏✨
