शिर्डी (प्रतिनिधी) —
शिर्डी परिसर पुन्हा एकदा गुन्हेगारांच्या धाडसी कारवायांमुळे हादरला आहे. निमगाव डोहाळे बायपास रोडवर पहाटेच्या सुमारास तीन अज्ञात दरोडेखोरांनी पिकअप ड्रायव्हरवर जीवघेणा हल्ला करून तब्बल ₹56,000 रोख लुटल्याची घटना घडली आहे. पोलिसांनी अज्ञात तिघांविरुद्ध गुन्हा दाखल करून तपास सुरू केला आहे.
🟥 “थांबव गाडी… नाहीतर जिवे मारू!” — मध्यरात्रीचा थरार
मिळालेल्या माहितीनुसार, भिमाशंकर दादाभाऊ भवर (वय 46, रा. समनापूर, ता. संगमनेर, जि. अहिल्यानगर) हे व्यावसायिक ड्रायव्हर असून स्वतःच्या एमएच-14 डीएम-9701 या पिकअप वाहनातून भंगार वाहतूक करतात.
दि. 27 ऑक्टोबर रोजी त्यांनी नांदगाव येथे भंगार सामान पोहोचवले. त्यासाठीचे ₹4,000 भाडे, बँकेतील ₹40,000 व स्थानिक व्यवहारातील ₹12,000 मिळून एकूण ₹56,000 इतकी रक्कम त्यांच्या जवळ होती.
ते रात्रौ अंदाजे 10.30 वाजता नांदगावहून समनापूरकडे निघाले, मात्र पहाटे 1.30 वाजता शिर्डीतील निमगाव डोहाळे बायपास रोडवर पाटाजवळ समोरून पल्सर मोटारसायकलवर तिघे अज्ञात इसम आले. त्यांनी गाडी आडवी घालून भवर यांना थांबवले आणि काही क्षणातच परिस्थिती भयावह झाली.
🟥 व्हील पानाने हल्ला — डोळा, बरगडी, कमरेवर गंभीर जखमा
त्या तिघांनी गाडीतील व्हील पाना काढून भवर यांच्यावर तुटून पडत डाव्या डोळ्यावर, बरगडीवर व कमरेवर जोरदार मारहाण केली.
भवर यांनी सांगितले की, “मी पैसे देण्यास विरोध केला असता त्यांनी माझ्या पँटचा खिसा फाडला आणि ₹56,000 जबरदस्तीने काढून घेतले.”
हल्ल्यादरम्यान आरोपींपैकी दोघे “सागर, सागर” असे एका साथीदाराला संबोधित करत होते.
लूट झाल्यानंतर तिघांनी “तुला जिवेच मारतो, गप्प बस नाहीतर मरेलस!” अशी धमकी देत पलायन केले.
जखमी अवस्थेत भवर यांनी कसाबसा शिर्डी पोलिस स्टेशन गाठले. पोलिसांनी त्यांना तत्काळ राहाता ग्रामीण रुग्णालयात उपचारासाठी दाखल केले व वैद्यकीय यादी घेऊन तक्रार नोंदवली.
🟥 शिर्डी पोलिसांचा तपास सुरू — ‘सागर’ नावावर लक्ष केंद्रित
सदर घटनेनंतर शिर्डी पोलीस ठाण्यात बी.एन.एस.एस.क. कलम 173 प्रमाणे गुन्हा नोंदवला गेला आहे.
पोलिसांनी घटनास्थळाची पाहणी करून सीसीटीव्ही फूटेज, मोबाईल लोकेशन व पल्सर बाईकचा मागोवा घेण्याचे प्रयत्न सुरू केले आहेत.
ड्रायव्हर भिमाशंकर भवर यांनी तक्रारीत स्पष्ट म्हटले आहे की,
“सदर इसमांना मी पुन्हा पाहिल्यास निश्चित ओळखू शकतो.”
शिर्डी परिसरातील बायपास रस्त्यांवर गेल्या काही महिन्यांत झालेल्या घटनांच्या पार्श्वभूमीवर ही घटना पोलिस यंत्रणेसाठी गंभीर इशारा ठरत आहे.
स्थानिक नागरिकांनी बायपास मार्गांवर रात्री पोलीस गस्त वाढवावी, अशी मागणी केली आहे.
🔹 जखमी: भिमाशंकर दादाभाऊ भवर (वय 46, रा. समनापूर, ता. संगमनेर)
🔹 लुटीची रक्कम: ₹56,000 रोख
🔹 आरोपी: तीन अज्ञात इसम (त्यातील एकाचे नाव “सागर” असल्याचा संशय)
🔹 वाहन: पल्सर मोटारसायकल
🔹 तपास अधिकारी: शिर्डी पोलीस स्टेशन
