शिर्डीत अनेक घरांत आज लग्नसोहळे असतानाही नागरिकांनी ‘पहिले मतदान, नंतर लग्न’ या भूमिकेचा अंगीकार करत केंद्रांवर लांबच लांब रांगा लावल्या. काही जणांनी तर लग्नाला जाण्यापूर्वी, तर काहींनी लग्न करून लगेच केंद्रात दाखल होत आपला लोकशाहीचा हक्क बजावला. चेहऱ्यावरचा आनंद, बोटावरची शाई—दोन्ही सारखेच महत्वाचे वाटत होते.
शेरवानीतला नवरदेव मतदानाला! केंद्रावर टाळ्यांचा कडकडाट
शिर्डी प्रभाग क्र. २ मधील जिल्हा परिषद शाळेत एक हटके आणि हृदयाला भिडणारा प्रसंग पाहायला मिळाला. रहिवासी ओमकार वारुळे आज आपल्या विवाहबद्ध होत आहेत… पण बोहल्यावर चढण्यापूर्वी त्यांनी बजावली ती लोकशाहीची ‘खरी’ परंपरा!
शेरवानी, पगडी, फुलांचा हार… अगदी परंपरागत नवरा सजून ओमकार थेट मतदान केंद्रावर दाखल झाले. त्यांना पाहताच केंद्रावर उपस्थित सर्व मतदार काही क्षणांसाठी थबकले, आणि लगेचच दणदणीत टाळ्यांनी स्वागत झाले.
मोबाईल कॅमेरे उघडले, स्मित हास्य पसरले आणि नवरदेव मतदानावर मोहर उमटवताना सर्वांनी तो क्षण कैद केला.
ओमकार यांनी मतदान केल्यानंतर सांगितलं –
“लग्न आयुष्यातील सुवर्णक्षण… पण मतदान हा जबाबदारीचा क्षण! देशाला दिशा देणाऱ्या या कर्तव्याला प्राधान्य दिलं, हे माझ्यासाठी आजचं सर्वात मोठं शुभकार्य.”
तरुणांसाठी ठरला ‘रोल मॉडेल’
नवरदेव मतदान केंद्रात आला ही बातमी विजेच्या वेगाने पसरली. अनेक तरुणांनी त्याचा आदर्श घेत मतदानासाठी जय्यत तयारी दाखवली. “लग्न असलं तरी मतदान चुकवायचं नाही”, असं वातावरण अनेक केंद्रांवर दिसून आलं.
मतदानाचा टक्का वाढण्याची शक्यता
प्रशासनानेही तरुणांचा उत्साह पाहून समाधान व्यक्त केलं असून मतदानाचा टक्का यामुळे लक्षणीय वाढेल, अशी अपेक्षा आहे.
आज शिर्डीत मतदान फक्त प्रक्रिया नव्हती… तो लोकशाहीचा उत्सव होता – आणि त्या उत्सवाचा ‘स्टार’ ठरला शेरवानीतला नवरदेव!
