पुनमनगरात तरुणावर जीवघेणा हल्ला-चाकूचा वार-दगडांनी मारहाण – गुन्हा दाखल

नमाजानंतर फिरत असताना घात; डोक्यावर बुक्क्या, पोटात चाकू
जखमी तरुण मोहम्मद दानीश नफीज चौधरी (वय २०) हा उत्तरप्रदेशातील मुजफ्फरनगर येथील रहिवासी असून सध्या रमजान निमित्त शिर्डीत कुरान पठणासाठी आला होता. दि. २१ फेब्रुवारी रोजी सायंकाळी ७.४५ ते ८.३० दरम्यान तो पुनमनगर येथील पाणी कुंडाजवळ पायी फिरत असताना मोटारसायकलवरून आलेल्या तिघांनी त्याचा पाठलाग केला.

अचानक डोक्यावर बुक्क्यांनी मारहाण करण्यात आली. त्यानंतर एकाने पोटाजवळ चाकूने वार केला, तर दुसऱ्याच्या हातात बंदुकसदृश वस्तू असल्याचे फिर्यादीने सांगितले आहे. खाली पडलेल्या अवस्थेत दगडांनी पाय व गुडघ्यांवर मारहाण करण्यात आली. डोक्यावर व कमरेवरही मुका मार लागल्याचे नमूद आहे.

📞 जखमी अवस्थेत वडिलांना फोन; स्थानिकांच्या मदतीने रुग्णालयात दाखल
हल्ल्यानंतर आरोपी आतल्या रस्त्याने मोटारसायकलवरून पसार झाले. जखमी अवस्थेत फिर्यादीने आपल्या वडिलांना फोन करून घटनेची माहिती दिली. चालता येत नसतानाही तो लंगडत चालत येऊन बाकड्यावर पडला. त्यावेळी परिसरातील नागरिकांनी मदत करत त्याला उपचारासाठी श्री साईबाबा हॉस्पिटल येथे दाखल केले.
सध्या तो शुद्धीवर असून त्याच्यावर उपचार सुरू आहेत.

⚖️ भारतीय न्याय संहितेनुसार गुन्हा दाखल
या प्रकरणी २२/०२/२०२६ रोजी पहाटे ०१:१० वाजता गुन्हा क्रमांक ०१४० नोंदवण्यात आला आहे. भारतीय न्याय संहिता कलम 118(1) अंतर्गत गुन्हा दाखल असून पुढील तपास सुरू आहे.
फिर्यादीच्या जबाबानुसार आरोपी तिघे मध्यम बांध्याचे, सावळ्या वर्णाचे असून त्यातील एकाने मेहंदी रंगाचा शर्ट परिधान केला होता. ते मराठी भाषेत बोलत होते, असे नमूद करण्यात आले आहे.

🔎 साईनगरीत सुरक्षा व्यवस्थेवर प्रश्नचिन्ह
धार्मिक नगरीत आलेल्या तरुणावर असा जीवघेणा हल्ला होणे अत्यंत चिंताजनक मानले जात आहे. पुनमनगर परिसरात वाढती वर्दळ असताना अशा प्रकारे हल्ला होणे हे कायदा-सुव्यवस्थेचे गंभीर चित्र दर्शवते.
पोलीस प्रशासनाने सीसीटीव्ही फुटेज, मोटारसायकलचा मागोवा व आरोपींची ओळख पटविण्याचे काम हाती घेतले असून नागरिकांनी सहकार्य करावे, असे आवाहन करण्यात येत आहे.

साईनगरीतील भाविकांच्या सुरक्षेचा प्रश्न पुन्हा ऐरणीवर आला असून, आरोपींना लवकरात लवकर अटक करून कठोर कारवाई करावी, अशी नागरिकांची मागणी आहे.
साईनगरी सुरक्षित राहिली पाहिजे – हीच सर्वांची अपेक्षा.

आरोपी अजून मोकाट; अटकेसाठी विशेष पथक नियुक्त
पुनमनगर येथील जीवघेण्या हल्ल्यानंतरही तिन्ही आरोपी अद्याप फरार असल्याची माहिती समोर आली आहे. घटनेच्या पार्श्वभूमीवर राहाता पोलीस ठाणे यांनी तपासाला वेग दिला असून आरोपींना जेरबंद करण्यासाठी विशेष पथक नेमण्यात आले आहे.

या प्रकरणात रणजित गलांडे (पोलीस निरीक्षक) यांच्या मार्गदर्शनाखाली तपास सुरू आहे. सीसीटीव्ही फुटेज तपासणे, मोटारसायकलचा मागोवा घेणे तसेच संशयितांची चौकशी अशी विविध पातळ्यांवर कारवाई सुरू करण्यात आली आहे.
पोलीस प्रशासनाकडून आरोपींना लवकरात लवकर अटक करण्यात येईल, असा विश्वास व्यक्त करण्यात येत आहे. दरम्यान, परिसरातील नागरिकांनी कोणतीही संशयास्पद माहिती त्वरित पोलिसांना कळवावी, असे आवाहन करण्यात आले आहे.
आरोपी कितीही दूर गेले तरी कायद्याच्या कचाट्यातून सुटणार नाहीत – पोलिसांचा इशारा.