शिर्डी पोलिसांची उल्लेखनीय कामगिरी-देशभरातील ७ राज्यांत शोधमोहीम-हरवलेले ५० महागडे मोबाइल शोधून मूळ मालकांच्या ताब्यात

शिर्डी (प्रतिनिधी) – श्रद्धेचं केंद्र असलेल्या शिर्डीत दररोज देश-विदेशातून हजारो भाविक दाखल होत असतात. या गर्दीचा फायदा घेऊन अनेक वेळा भाविकांचे व स्थानिक नागरिकांचे मोबाइल गहाळ होण्याच्या घटना घडतात. मात्र अशा घटनांमध्ये केवळ तक्रार नोंदवून थांबण्याऐवजी शिर्डी पोलिसांनी तंत्रज्ञानाच्या बळावर मोठी कामगिरी करत ५० हरवलेले महागडे मोबाइल फोन शोधून काढले असून ते मूळ मालकांच्या ताब्यात दिले आहेत. या सर्व मोबाइलची एकूण किंमत ८ लाख ४० हजार रुपये इतकी आहे.

🔹 CEIR पोर्टलमुळे शक्य झाले यश
मोबाइल गहाळ झाल्यानंतर नागरिकांनी शिर्डी पोलीस ठाण्यात तक्रारी दाखल केल्या होत्या. त्यानंतर केंद्र सरकारच्या सेंट्रल इक्विपमेंट आयडेंटिटी रजिस्टर (CEIR) पोर्टलवर मोबाइलची IMEI क्रमांकासह सविस्तर माहिती अपडेट करण्यात आली.
या पोर्टलच्या माध्यमातून तांत्रिक विश्लेषण करत पोलिसांनी मोबाइल कुठल्या नेटवर्कवर, कुठल्या राज्यात आणि कुणाच्या वापरात आहेत याचा अचूक मागोवा घेतला.
या तपासात महाराष्ट्र, कर्नाटक, आंध्र प्रदेश, तेलंगणा, तामिळनाडू, मध्य प्रदेश व गुजरात अशा ७ वेगवेगळ्या राज्यांत हे मोबाइल वापरात असल्याचे निष्पन्न झाले. त्यानंतर समन्वय साधत संबंधित राज्यांतील पोलिसांच्या मदतीने मोबाइल हस्तगत करण्यात आले.

🔹 भाविकांच्या चेहऱ्यावर आनंद, पोलिसांवर विश्वास
हरवलेला मोबाइल परत मिळाल्यानंतर अनेक भाविकांच्या व नागरिकांच्या चेहऱ्यावर आनंद ओसंडून वाहत होता. काही मोबाइलमध्ये महत्त्वाचे फोटो, वैयक्तिक माहिती, बँकिंग अ‍ॅप्स व व्यावसायिक डेटा असल्याने मोबाइल परत मिळणे ही त्यांच्या दृष्टीने मोठी दिलासा देणारी बाब ठरली.
“मोबाइल हरवला म्हणजे संपलं असंच वाटत होतं, पण शिर्डी पोलिसांनी अशक्य वाटणारी गोष्ट शक्य करून दाखवली,” अशा भावना अनेक नागरिकांनी व्यक्त केल्या.

🔹 वरिष्ठ अधिकाऱ्यांचे मार्गदर्शन, पथकाची मेहनत
ही संपूर्ण कारवाई
पोलीस अधीक्षक सोमनाथ घार्गे,
अपर पोलीस अधीक्षक सोमनाथ वाकचौरे,
उपविभागीय पोलीस अधिकारी अमोल भारती
यांच्या मार्गदर्शनाखाली राबवण्यात आली.
शिर्डी पोलीस ठाण्याचे
पोलीस निरीक्षक रणजित गलांडे,
पोलीस उपनिरीक्षक सागर काळे,
निवांत जाधव, संदीप उंडावत
आणि विशेष शोध पथकाने सातत्याने पाठपुरावा करत ही कारवाई यशस्वी केली.

🔹 नागरिकांसाठी महत्त्वाचे आवाहन
मोबाइल गहाळ झाल्यास नागरिकांनी घाबरून न जाता
1️⃣ त्वरित जवळच्या पोलीस स्टेशनमध्ये ‘मिसिंग’ची तक्रार दाखल करावी
2️⃣ CEIR पोर्टलवर मोबाइलची सविस्तर माहिती भरावी
यामुळे मोबाइल ब्लॉक होतो तसेच तो शोधण्यास पोलिसांना मोठी मदत मिळते.

🟦 पोलिसांची खर्‍या अर्थाने वाहवाह
भाविकांच्या सुरक्षिततेबरोबरच त्यांच्या मौल्यवान मालमत्तेचे संरक्षण करण्यासाठी शिर्डी पोलिसांनी केलेली ही कामगिरी तंत्रज्ञान, मेहनत आणि प्रामाणिकतेचं उत्तम उदाहरण ठरत आहे.
शिर्डी पोलिसांची ही धडाकेबाज कामगिरी नक्कीच इतर पोलीस यंत्रणांसाठी प्रेरणादायी आहे.