श्रद्धेच्या नावाने ऑनलाईन लूट; साईभक्तांना जाळ्यात ओढणारी सायबर टोळी सक्रिय
शिर्डीत साईभक्तांच्या श्रद्धेलाच टार्गेट करत बनावट वेबसाईटच्या माध्यमातून ऑनलाईन फसवणूक करणाऱ्या अज्ञात सायबर टोळीचा धक्कादायक प्रकार समोर आला आहे. श्री साईबाबा संस्थानच्या नावाचा वापर करून “साई अश्रम भक्तनिवास”ची बनावट वेबसाईट तयार करण्यात आली आणि त्यावर संस्थानच्या इमारतींचे फोटो टाकून भाविकांना अधिकृत बुकिंग असल्याचा भास निर्माण करण्यात आला.
या प्रकरणी शिर्डी पोलीस ठाण्यात FIR क्रमांक 0445/2026 नुसार भारतीय न्याय संहिता 2023 च्या कलम 318(4) आणि 336(3) अंतर्गत अज्ञात आरोपींविरोधात गुन्हा दाखल झाला आहे.
“साईंच्या दर्शनासाठी या… आणि जाळ्यात अडकून पैसे गमवा!” — फसवणुकीचा धक्कादायक फॉर्म्युला
सायबर भामट्यांनी तयार केलेल्या वेबसाईटवर “भक्तनिवास बुकिंग”च्या नावाखाली भाविकांकडून पैसे उकळण्याचा प्रकार सुरू होता. विशेष म्हणजे वेबसाईट इतक्या चलाखीने बनवण्यात आल्या होत्या की सामान्य साईभक्ताला त्या खऱ्या की खोट्या हे ओळखणेही कठीण होत होते.
तपासादरम्यान पुढील वेबसाईट संशयित आढळल्या —
saiashrambhaktiniwashotelbooking.co.in
saiashrambhaktaniwas.site
यासोबत 9660309672, 7374823314 आणि 8796021766 हे मोबाईल क्रमांक वापरले जात असल्याचेही उघड झाले.
“श्रद्धा विकून पैसा कमावणारे कोण?” — साईभक्तांत संताप
देश-विदेशातून लाखो भाविक शिर्डीत साईंच्या दर्शनासाठी येतात. त्याच भाविकांच्या श्रद्धेचा गैरफायदा घेत सायबर टोळीने “साई अश्रम”चे नाव वापरून डिजिटल फसवणुकीचे जाळे विणल्याने संताप व्यक्त केला जात आहे.
“देवाच्या नावावरही आता फसवणूक सुरू झाली असेल तर सामान्य भक्ताने कोणावर विश्वास ठेवायचा?” असा संतप्त सवाल साईभक्त उपस्थित करत आहेत.
आयटी विभागाच्या सतर्कतेमुळे कट उघड
श्री साईबाबा संस्थानच्या माहिती तंत्रज्ञान विभागाने सोशल मीडियावर आणि इंटरनेटवर सुरू असलेल्या संशयास्पद हालचालींवर लक्ष ठेवले होते. त्याच वेळी या बनावट वेबसाईट समोर आल्या. संस्थानचे तांत्रिक सहायक रमेश पुजारी आणि त्यांच्या टीमने तपास करून हा प्रकार उघडकीस आणला.
सायबर गुन्हेगारांवर आता मोठी कारवाई?
शिर्डी पोलीस आणि सायबर यंत्रणा आता वेबसाईट डोमेन, मोबाईल नंबर, डिजिटल पेमेंट ट्रेल आणि IP लोकेशनच्या आधारे आरोपींचा शोध घेत आहेत. या रॅकेटमागे मोठे सायबर नेटवर्क असल्याची शक्यता व्यक्त केली जात आहे.
साईभक्तांसाठी इशारा
⚠️ गुगलवर दिसणारी प्रत्येक वेबसाईट अधिकृत नसते
⚠️ बुकिंग करण्यापूर्वी वेबसाईटची खात्री करा
⚠️ संशयास्पद नंबरवर पैसे पाठवू नका
⚠️ फक्त अधिकृत संस्थान वेबसाईटच वापरा
“साईंच्या नावावर हात साफ करणाऱ्यांना आता पोलिसांचा दंडुका बसणार का?” याकडे संपूर्ण शिर्डीचे लक्ष लागले आहे.
