साईनगरी शिर्डीत गुन्हेगारी प्रवृत्तीच्या व्यक्तींनी पुन्हा एकदा डोके वर काढल्याचे चित्र समोर आले आहे. शिर्डीतील तरुण सतीष लोंढे याच्यावर मध्यरात्रीच्या सुमारास कथितपणे बीअरच्या काचेच्या बाटलीने जीवघेणा हल्ला करण्यात आल्याची धक्कादायक घटना उघड झाली आहे. हल्ल्यानंतर रक्तबंबाळ अवस्थेत जीव वाचवण्यासाठी तो तरुण धावत असल्याचे प्रत्यक्षदर्शींनी पाहिल्याचे फिर्यादीत नमूद करण्यात आले आहे. या घटनेमुळे शहरातील कायदा व सुव्यवस्थेवर गंभीर प्रश्नचिन्ह निर्माण झाले आहे.
“मदतीसाठी ओरडत होता, पण दहशतीमुळे कोणी पुढे आले नाही”
फिर्यादीनुसार, जखमी सतीष लोंढे हा मदतीसाठी आरडाओरडा करत होता. मात्र हल्लेखोरांच्या दहशतीमुळे कोणीही मदतीसाठी पुढे आले नसल्याचा आरोप करण्यात आला आहे. एका धार्मिक आणि आंतरराष्ट्रीय स्तरावरील तीर्थक्षेत्रात अशी परिस्थिती निर्माण होत असेल, तर सामान्य नागरिक आणि साईभक्तांच्या सुरक्षेचा प्रश्न ऐरणीवर आला आहे. मध्यरात्रीच्या वेळी शहरातील सार्वजनिक ठिकाणी अशा प्रकारे हल्ले होत असतील तर गुन्हेगारांच्या मनात पोलिसांचा धाक उरला आहे का, असा सवाल नागरिक उपस्थित करत आहेत.
करण आव्हाड आणि सोन्या बागुल विरुद्ध गुन्हा दाखल
या प्रकरणी शिर्डी पोलीस ठाण्यात FIR क्रमांक 0429/2026 अन्वये करण सुरेश आव्हाड आणि किरण उर्फ सोन्या अशोक बागुल यांच्याविरुद्ध भारतीय न्याय संहितेच्या विविध कलमान्वये गुन्हा दाखल करण्यात आला आहे. फिर्यादीनुसार, करण आव्हाड याने काचेच्या बाटलीने डोक्यात प्रहार करून गंभीर दुखापत केली, तर सोन्या बागुल याने शिवीगाळ, दमदाटी आणि मारहाण केल्याचा आरोप आहे. पोलिसांनी गुन्हा नोंदविला असला तरी आरोपींविरुद्ध कठोर कारवाई होणार का, याकडे सर्वांचे लक्ष लागले आहे.
नवीन पोलीस अधीक्षकांकडून कडक कारवाईची अपेक्षा
अहिल्यानगर जिल्ह्यात नव्याने रुजू झालेल्या पोलीस अधीक्षकांसमोर शिर्डीतील वाढती गुन्हेगारी हे मोठे आव्हान ठरत आहे. साईभक्तांची नगरी म्हणून जगभर ओळख असलेल्या शिर्डीत जर गुंडगिरी, मारामाऱ्या आणि दहशतीचे प्रकार वाढत असतील, तर त्याचा शहराच्या प्रतिमेवरही परिणाम होऊ शकतो. त्यामुळे अशा प्रवृत्तींवर लगाम घालण्यासाठी आरोपींवर कठोर कारवाई करून गुन्हेगारांच्या मुसक्या आवळल्या जातील का, याकडे नागरिक आणि साईभक्तांचे लक्ष लागले आहे.
“साईनगरीत श्रद्धेचे वातावरण टिकवायचे असेल, तर गुन्हेगारांवर पोलादी कारवाई करावी लागेल,” अशी भावना नागरिकांमधून व्यक्त होत आहे.
