शिर्डी | प्रतिनिधी
शिर्डी येथे दर्शनासाठी आलेल्या एका अल्पवयीन मुलीशी कथित छेडछाडीच्या घटनेच्या निषेधार्थ 20 जून रोजी हिंदू जनआक्रोश मोर्चाचे आयोजन करण्यात आले आहे. या घटनेतील आरोपीवर कठोर कारवाई करण्यात यावी, तसेच भाविकांच्या सुरक्षेच्या दृष्टीने ठोस उपाययोजना कराव्यात, अशी मागणी आंदोलनकर्त्यांनी केली आहे.
मोर्चाच्या आयोजकांनी प्रसिद्ध केलेल्या पत्रकानुसार, संबंधित घटनेमुळे भाविकांमध्ये संतापाची भावना निर्माण झाली असून शिर्डीसारख्या जागतिक तीर्थक्षेत्रात महिला व भाविकांच्या सुरक्षेचा प्रश्न ऐरणीवर आला आहे. या पार्श्वभूमीवर सकल हिंदू समाजाच्या वतीने हा जनआक्रोश मोर्चा काढण्यात येणार आहे.
हा मोर्चा शनिवार, 20 जून 2026 रोजी सायंकाळी 5 वाजता नगरपालिका जवळील पाण्याच्या टाकीपासून सुरू होणार असल्याची माहिती देण्यात आली आहे. मोठ्या संख्येने नागरिक, भाविक व विविध हिंदुत्ववादी संघटनांचे कार्यकर्ते सहभागी होणार असल्याचा दावा आयोजकांनी केला आहे.
मोर्चामध्ये आमदार संग्राम जगताप, माजी खासदार सुजय विखे पाटील यांच्यासह विविध मान्यवर उपस्थित राहणार असल्याचे पत्रकात नमूद करण्यात आले आहे.
आयोजकांनी सर्व हिंदू बांधवांना मोठ्या संख्येने उपस्थित राहण्याचे आवाहन केले असून, भाविकांच्या सुरक्षेसाठी आणि दोषींवर कठोर कारवाईच्या मागणीसाठी हा मोर्चा काढला जात असल्याचे सांगितले आहे.
